Американските компании почнаа со масовни отпуштања

Во февруари, американските компании објавија дека отпуштаат 172.017 вработени, што е зголемување од 245 отсто во однос на јануари и најмногу од јули 2020 година, кога преовладуваше неизвесноста на пазарот поради пандемијата на коронавирус. Ако ги погледнеме само податоците за февруари, оваа бројка е највисока од 2009 година и од периодот на светската финансиска криза.

Според податоците што денеска ги објави консултантската фирма „Челинџер, Греј и Крисмес“, повеќе од една третина од оваа бројка е резултат на напорите на милијардерот Илон Маск да го намали бројот на вработени во американските владини институции, со поддршка на американскиот претседател Доналд Трамп.

Американските владини агенции објавија отпуштања за 62.242 работници во февруари, пренесува CNBC.

Зголемувањето на отпуштањата во февруари е резултат на политиките на Одделот за владина ефикасност (DOGE), на чело со Маск, како и на откажаните владини договори и стравувањата од трговски војни и банкротства, изјави експертот за работни места Ендрју Челинџер.

Претседателот Доналд Трамп ја презеде функцијата на 20 јануари, а неговите планови за воведување тарифи, намалување на работната сила во владините агенции и масовните депортации на илегални имигранти почнуваат да влијаат на пазарот на труд. Анкетите на американските потрошувачи укажуваат на загриженост за инфлацијата и отпуштањата, додека други показатели сугерираат дека американската економија е силна. Американската компанија за обработка на плати ADP објави дека вработеноста во приватниот сектор се зголемила за само 77.000 во февруари.

Извор: biznisinfo.mk