Хрватските поштари добиваат 20 отсто поголема плата, па дури и божиќен бонус од 500 евра

„Хрватска пошта“ ги зголемува платите на оперативните позиции за 20 проценти, со што се опфатени повеќе од 7.000 работници. Оперативните работни места, меѓу другото, вклучуваат поштари, доставувачи, возачи, работници во фабрика за сортирање и оператори на пошти, истакна ХП, објави Даница.хр. Зголемувањето на платите ќе се спроведува во три фази: десет проценти од 1 февруари, пет проценти од 1 јуни и дополнителни пет проценти од 1 септември следната година.

Дополнително, годинава на сите работници ќе им биде исплатен божиќен бонус во износ од 500 евра, што е за 300 евра повеќе од пропишаната сума со Колективниот договор. Просечната почетна нето плата на еден поштар во моментов е околу 800 евра нето, се дознава од тендерите на кои ХП барала повеќе вработени за таа позиција во последните месеци. Според тоа, зголемувањето од 20 отсто би им донело 100-тина евра повеќе во нето износот следната година.

Раководството на „Хрватска пошта“ во последните години покрена бројни иницијативи за зголемување на животниот стандард на работниците, како што се променливите награди за ефикасност и зголемувањето на партиципацијата за транспорт и храна. Годинава воведен е дополнителен бонус од 1.200 евра за поштарите и возачите кои ќе останат во компанијата до крајот на годината. Лани ХП веќе ја зголеми платата на сите работници за 25 отсто, додека претходната година зголемувањето беше 20 отсто за оперативните работници.