Пензионерскиот синдикат на Македонија и ФЕРПА со честитка по повод 1-ви октомври – Меѓународниот ден на пензионерите: Бараме воведување на минимална пензија

Пензионерскиот синдикат на Македонија на сите пензионери и постари лица им го честита 1-ви октомври – Меѓународниот ден на пензионерите.

Како синдикат, уште од нашето формирање се залагаме за унапредување на социо-економскиот статус на пензионерите во Македонија и континуирано предлагаме мерки со кои би се подобрил истиот.

Во оваа прилика сакаме да го поздравиме зголемувањето на пензиите за 2,500 денари од овој месец, но и да порачаме дека и покрај ова зголемување и она коешто ќе се случи во март 2025, кога пензиите ќе се зголемат за истата сума, пензиите се‘ уште не се доволни за пензионерите да имаат пристоен живот. Воедно бараме и да се воведе минимална пензија.

Во продолжение ќе споделиме дел од честитката која ни ја испратија од Европската федерација на пензионери и постари лица (ФЕРПА), каде што членуваме.

„Сите организации на ФЕРПА ја користат можноста од 1 октомври да се мобилизираат, со цел да се слушне нивниот и гласот на постарите. Тие исто така, имаат намера да потсетат на нивните приоритетни барања:

• Автоматско индексирање на сите пензии врз база на платите или цените
• Воспоставување на минимална пензија, над прагот на сиромаштија и еднаквост помеѓу мажите и жените во однос на прашањата кои се однесуваат на пензионерите
• Право на долгорочна, квалитетна здравствена заштита за сите
• Право на квалитетно домување земајќи ги предвид потребите на старите лица и
• Право на пристап до енергија и основни услуги.“