Пивото веќе не е во мода: Поради послабата побарувачка, Heineken укинува 6.000 работни места

Heineken соопшти дека ќе укине до 6.000 работни места на глобално ниво и дека во 2026 година очекува помал раст на добивката отколку во 2025 година, поради слабата побарувачка со која се соочува пиварската индустрија.

Вториот најголем производител на пиво во светот според пазарната вредност, холандскиот Heineken, во моментов е во потрага по нов генерален директор, откако актуелниот извршен директор Долф ван ден Бринк неочекувано поднесе оставка во јануари. Компанијата најави дека ќе се обиде да постигне поголем раст со помалку ресурси, со цел да ги смири инвеститорите кои сметаат дека Heineken заостанува зад конкурентите во однос на ефикасноста, пренесува агенцијата Reuters.

Во исто време, продажбата во целиот сектор забавува поради влошената финансиска состојба на потрошувачите, геополитичките тензии и неповолните временски услови.

Следуваат отпуштања

Производителот на пивата Tiger и Amstel, покрај истоименото лагер пиво Heineken, соопшти дека програмата за зголемување на продуктивноста ќе донесе значителни заштеди и ќе доведе до намалување на бројот на вработени за меѓу 5.000 и 6.000 лица во следните две години. Тоа претставува речиси 7 проценти од вкупно околу 87.000 вработени ширум светот.

„Ова го правиме за да го зајакнеме нашето работење и да можеме да инвестираме во раст“, изјави финансискиот директор Харолд ван ден Брук за време на конференцискиот повик по повод објавата на годишните резултати.

Дел од отпуштањата ќе се однесуваат на Европа или на пазари кои не се приоритетни и нудат помали можности за раст, додека дел ќе произлезат од претходно најавените иницијативи поврзани со синџирот на снабдување, централата и регионалните деловни единици на компанијата.

Помал раст на добивката од очекуваното

Генералниот директор во заминување Долф ван ден Бринк, кој ќе ја напушти функцијата во мај, изјави дека засега нема нови информации во врска со изборот на негов наследник.

Покрај слабата побарувачка, Heineken и неговите конкуренти, меѓу кои и Anheuser-Busch InBev, се соочуваат и со долгорочен пад на продажбата на некои клучни пазари. Овој тренд се поврзува со зголемената загриженост за влијанието на алкохолот врз здравјето, како и со растечката популарност на лековите за слабеење.

Heineken очекува растот на добивката во 2026 година да се движи меѓу 2 и 6 проценти, што е помалку во споредба со растот од 4 до 8 проценти најавен за 2025 година.

Компанијата, сепак, пријави годишна органска оперативна добивка над очекувањата, со раст од 4,4 проценти во 2025 година, додека аналитичарите прогнозираа раст од околу 4 проценти.

Извор: b92.net