Работните места на иднината: Кои ќе профитираат најмногу, а кои ќе останат без работа?

Физичките работи, како оние во земјоделството и транспортот, ќе останат меѓу најбараните до 2030 година. Сепак, најбрзо расте побарувачката за ИТ стручњаци и специјалисти за вештачка интелигенција, додека административните и шалтерските работи полека исчезнуваат. Што ја очекува глобалната работна сила и кој треба веќе од денес да започне со преквалификација?

Според истражувањето на Светскиот економски форум, побарувачката за физичка работа ќе остане највисока во следните неколку години, но дигиталните професии ќе забележат најбрз раст. Во исто време, голем број административни и канцелариски работни места би можеле да исчезнат. Засега, иднината без работници изгледа како невозможна опција.

И покрај развојот на дигиталните технологии, рачната работа ќе продолжи да биде најбарана во следните пет години. Повеќе од 35 милиони нови работни места глобално се очекуваат во земјоделскиот сектор. Околу 10 милиони нови позиции ќе бидат отворени за возачи на камиони и доставувачи, повеќе од 5 милиони нови работни места за програмери, како и значаен број нови позиции во градежништвото.

Технолошкиот сектор со најбрз раст

Кога станува збор за професии со најбрз раст, технолошките занимања се на врвот на листата. Специјалистите за обработка на големи податоци бележат раст од речиси 120%, инженерите во финтек индустријата околу 100%, а експертите за вештачка интелигенција и машинско учење околу 80%.

Кои занимања се најзагрозени?

Најголем ризик од исчезнување имаат канцелариските и административните работни места. Според апсолутните бројки, најголем пад се очекува кај касиерите – околу 15 милиони работни места може да исчезнат. Следат административните асистенти, хигиеничари, собарки и магационерски работници, со околу 5 милиони загрозени позиции.

Брзо исчезнуваат и поштенските работници и шалтерските службеници во банките – бројот на вработени може да се намали до 40%. Кај операторите за внес на податоци и касиерите се предвидува пад од околу 20%.

Сепак, тоа не значи дека сите работни места во малопродажбата ќе исчезнат. Напротив, продавачите и асистентите во продажбата се на петтото место според раст на вработување, со речиси 5 милиони нови работни позиции.

Нови вработувања или преквалификација?

Истражувањето се занимава и со односот меѓу луѓето и технологијата на работното место. Моментално, околу 48% од задачите ги извршуваат луѓе, 32% се делат меѓу луѓе и технологија, а 20% се целосно автоматизирани.

До 2030 година, се очекува голема промена: само 34% од задачите ќе ги извршуваат исклучиво луѓе, уште 34% ќе бидат поделени со технологијата, а 32% ќе бидат автоматизирани.

За подобрување на ефикасноста, европските работодавци планираат и нови вработувања и преквалификација на постоечкиот кадар. Повеќето компании ги применуваат двата пристапа, но 79% преферираат преквалификација, додека 65% планираат нови вработувања.

Предизвиците на европскиот пазар на труд

Според извештајот, 59% од светската работна сила ќе мора да помине преку процес на преквалификација до 2030 година. Во Европа, 54% од работодавците стравуваат од недостиг на работна сила – бројка над глобалниот просек.

Во Шпанија, недостатокот на вештини се смета за главна пречка. Дури 60% од работодавците сметаат дека решението се реформи на законите за труд, кои би овозможиле полесно вработување и отпуштање, а 49% бараат поголема флексибилност во определување на платите.

Во Франција, 46% од работодавците веруваат дека измените во пензискиот систем и подигањето на старосната граница за пензионирање би ја зголемиле достапноста на квалификуваната работна сила.

Геополитичките ризици како фактор на несигурност

Освен дигитализацијата, климатските промени и зголемените животни трошоци, европскиот пазар на труд ќе биде силно обликуван од геополитичките неизвесности. Во Обединетото Кралство, дури 56% од компаниите ги гледаат геополитичките тензии како клучен фактор на промени. Сличен став има и Германија (52%), која неодамна стана четвртиот најголем воен потрошувач во светот.

Од друга страна, италијанските работодавци најмногу се фокусираат на климатските предизвици: 70% од нив ги сметаат зелените инвестиции како главен двигател на трансформацијата на пазарот на труд – далеку над глобалниот просек од 43%.

Извор: EUpravo zato / euronews.com