- Advertisement -
ЕкономијаМакедонијаНовостиСветот на работникот

Сточарите ги бараат субвенциите за 2020 година, во спротивно ќе блокираат патишта

Сточарите ги бараат субвенциите - Работник
229views

Поголема група сточари од северозападниот регион одржаа протестен собир на кој од државните институции побараа да им бидат исплатени субвенциите за добиток предвидени за минатата година. Доколку, нивните барања не бидат прифатени, тие за крајот на неделата најавуваат блокади на државните патишта.

Сточарите од тетовско, гостиварско, кичевско дебарско се револтирани од доцнењето на финансиската поддршка и сметаат дека се изманипулирани и досега добиле само ветување.

– Се соочуваме со недостиг од храна за овците. Парите ни се итно потребни, а не да се префрлаат на други места. Со нашиот труд што го вложуваме во добитокот и она што ни припаѓа, се прави компензација за субвенциите за тутунот. Тоа не е во ред, ние како произведувачи на храна да бидеме тргнати настрана, беше речено на протестот.

Сточарите, меѓу кои најбројни беа оние што одгледуваат овци, посочија дека состојбата во која се наоѓаат е сериозна и дополнително отежната заради пандемијата. Тие, како што беше кажано, упатуваат апел Платежната агенција и Министерството за земјоделство да ги земат предвид нивните барања. Доколку не бидат исполнети до дадениот рок најавуваат, продолжување на протестите со порадикални мерки како блокирање на патишта.

Сточарите кои денес протестираа одгледуваат над 180 илјади грла овци, за кои од државата треба да добијат над три милиони евра финансиска поддршка. Субвенцијата за едно грло се движи околу 900 денари, а за чување на женско јагне таа достигнува 2.400 денари.