Не паничете ако работодавачот ве праша за „празнина“ во CV-то: кариерен експерт открива како точно да одговорите

На интервју за работа, секој дел од вашата работна историја може да биде тема на прашања – вклучително и периодите кога не сте работеле, вели кариерниот експерт Ерин Мекгоф.

Ако работодавачот ве праша за „празнина“ во вашето CV, нема потреба од паника. Наместо тоа, важно е да бидете подготвени и да одговорите смирено и самоуверено.

Во минатото, ваквите паузи во кариерата можеа да бидат хендикеп, но денес сè повеќе луѓе немаат линеарен кариерен пат. Според Ерин Мекфог, најдобро е да не се избегнува темата, туку да се објасни директно – со цел да се отстранат сите сомнежи и да се покаже подготвеност за понатамошен развој.

Целта е работодавачот да помисли: „Ова има смисла, ова воопшто не е проблем.“

Фокусирајте се на сегашноста и иднината

Кога одговарате, експертот препорачува таканаречено правило 90/10:

• 10% од одговорот да биде објаснување на паузата
• 90% да се фокусира на вашите вештини, искуство и научени лекции

Важно е одговорот да биде позитивен и насочен кон иднината.

На пример, ако сте паузирале поради грижа за семејството, можете да кажете:
„Се повлеков од полно работно време за да се грижам за моите деца.“

Потоа, нагласете што сте правеле во меѓувреме – фриленс ангажмани, обуки, конференции или следење на трендови во индустријата.

На крај, покажете ентузијазам:
„Многу сум возбуден/а што повторно се враќам на работа,“ и објаснете зошто токму таа позиција ве привлекува.

Отпуштањата не се повеќе „црвено знаме“

Отпуштањата се една од најчестите причини за празнини во CV-то. Поради масовните откази во последните години, работодавачите денес многу поретко ги гледаат како проблем.

Краток и јасен одговор е доволен:
„Многу ја сакав претходната работа, но за жал бев дел од реструктурирање во компанијата.“

Потоа пренасочете го разговорот кон новата можност:
„Благодарен/на сум што сега имам шанса да ја искористам оваа можност,“ и објаснете што ве привлекува во новата улога.

Кратко, јасно и самоуверено

Според Ерин Мекгоф, најважно е одговорот да биде концизен и сигурен. Кандидатите не се обврзани да откриваат детали за личните причини.

Ако сакате да останете општи, можете да кажете:
„Зедов пауза од полно работно време поради лични причини. Сега сè е решено и со нетрпение очекувам да се вратам на работа.“

Во суштина, самата „празнина“ ретко е пресудна. Ако сте повикани на интервју, тоа значи дека работодавачот веќе е заинтересиран – прашањето е повеќе од љубопитност отколку од загриженост.

Извор: CNBC Make it