Работници низ цела Грција во штрајк – не сообраќаа таксија и возови! Причина: можност за воведување 13-часовен работен ден
Вработените во јавниот и приватниот сектор низ цела Грција вчера стапија во генерален штрајк, изразувајќи незадоволство од предложените измени на Законот за работни односи.
Во текот на целиот ден во Атина не сообраќаа возови и такси возила, додека останатите линии на градскиот превоз функционираа со намалена фреквенција. Оваа акција предизвика сериозни нарушувања во работата на институциите низ целата земја – од училишта и судови, до болници и локални администрации. Во повеќе градови беа закажани протестни собири, а во главниот град најавени два одделни марша.
Организаторите на штрајкот – синдикатите на државните службеници и работниците од приватниот сектор – остро се спротивставуваат на законските измени кои властите ги претставуваат како чекор кон поголема флексибилност на пазарот на труд.
Што предвидува новиот закон?
Предложените прописи овозможуваат продолжени смени до 13 часа, како и работна недела што, со вклучени прекувремени часови, би можела да достигне и до 48 часа. Работодавачите би имале право да побараат до 150 часа прекувремена работа годишно по работник.
Синдикатите предупредуваат дека ваквите одредби отвораат простор за злоупотреби и дополнително ќе ги оптоварат вработените.
„Не прифаќаме смени од 13 часа. Исцрпеноста не води кон напредок, а човековата издржливост има граници,“ порача Генералната конфедерација на работници на Грција – најголемата синдикална централа во приватниот сектор.
Тие бараат враќање на колективното договарање и скратување на работната недела на 37,5 часа, што го гледаат како единствен пат кон поправедни и похумани услови за работа.
📌 Mass strike rally in Athens
— PAME Greece International (@PAME_Greece) October 1, 2025
🚮 Throw the 13-hour workday bill in the bin
✔️ 7 hour day – 5-day week – 35 hour week with wage increases pic.twitter.com/mwAE08DYqr
Владата: мерката е „исклучок“
Премиерот Киријакос Мицотакис, на власт од 2019 година, изјави дека многу млади Грци веќе работат две работи и сакаат да заработат повеќе.
„Гарантираме слобода на избор и за работникот и за работодавачот. Зошто тоа би било антисоцијално?“, изјави тој неодамна.
Министерката за труд, Ники Керамеус, нагласи дека мерката е „исклучок“ и дека нема да стане правило. „Се применува максимум 37 дена годишно, исклучиво со согласност на работникот и со зголемување на платата од 40%“, рече таа за Mega TV.
Кревка економија и ниски плати
Иако Грција бележи пад на невработеноста и континуиран раст на БДП – минатата година 2,3% според Европската комисија – ниските плати остануваат еден од најголемите проблеми, заедно со високите трошоци за живот. Минималната плата, иако зголемена, изнесува 880 евра месечно.
Според податоците на Евростат, Грците во просек работат 39,8 часа неделно, наспроти просекот во ЕУ од 35,8 часа. Во туристичкиот сектор, за време на сезоната, келнерите и готвачите често работат долги смени, понекогаш и без слободен ден во неделата.
Законот моментално предвидува 8-часовен работен ден со можност за платен прекувремен труд, а веќе е воведена и можност за шестдневна работна недела во одредени сектори, особено туризмот.
Извор: EUpravozato
