Што ни открива пандемијата од ден на ден од аспект на здравје и безбедност при работа?

Пандемијата со Ковид 19 е ситуација која значеше будење за целиот свет, кој покрај големиот број на жртви, огромното економско и здравствено влијание, ни ги извади на виделина и слабостите на модерното општество, обелоденувајќи го јазот помеѓу глобалните економии.

Новите политики на пазарот на трудот за Ковид 19 својот фокус го ставија на градењето на отпорност во однос на расположливата работна сила, борбата против невработеноста и ублажувањето на идните економски шокови, наместо да се стави приоритет на безбедноста на работното место. Ова претставува критична грешка бидејќи ги остава најранливите работници во општеството најизложени на вирусот и им отежнува на економиите да продолжат со работа без голем број човечки жртви.

Покрај здравствените работници, беа пријавени голем број инфекции меѓу работниците за достава, вработените во продавниците за храна, санитарите и другите вработени во првите линии на фронтот. Исто така, останаа незаштитени работниците на таканаречените „тезги”, односно оние кои работат на отворено- на зелените пазари и сл., работниците ангажирани краткорочно или пак на нула часови, како и голем број вработени кај подизведувачи. Овие резултати нагласуваат дека физичките поставки и условите за работа не се единствените двигатели на болеста, но и дека условите за вработување и социоекономски ранливости исто така ја влошуваат изложеноста на инфекцијата, а со тои и последователната смртност.

Сè на сè, пандемијата доведе во фокусот три критични точки на безбедноста и здравјето при работа (БЗР): (1) дали работната средина и условите се безбедни за работниците; (2) дали условите за вработување вклучуваат заштита на здравјето на работниците; (3) и дали работниците се овластени да го чуваат сопственото здравје и здравјето на нивните соработници.