4.500 евра за заминување од компанијата по само две недели работа

Американска софтверска компанија им нуди пари на нововработените кои ќе одлучат дека не сакаат да продолжат со работата. Целта е уште на почетокот да се утврди кој навистина сака да остане, а кој не се гледа долгорочно во компанијата.

Да добијат 4.500 евра за да ја напуштат компанијата по само две недели работа – ваква можност им се нуди на нововработените во американската софтверска компанија „Trainual“. Преку оваа практика, работодавачот сака навреме да дознае дали вработените се подготвени да останат, пред да вложи дополнителни средства во нивната обука и да ги вклучи во долгорочни проекти.

Истражувањето за тоа дали финансиските понуди за заминување им се исплатат на работодавачите е објавено во научното списание „Journal of Management Accounting Research“, а за него на 22 октомври пишуваше порталот „HR Dive“.

Резултатите укажуваат на два можни ефекта: понудата ги поттикнува да заминат оние вработени кои се послабо поврзани со организацијата, додека кај оние што ќе ја одбијат може да ја зголеми мотивацијата за работа.

Парите најмногу влијаат врз вработените кои се двоумат

Авторите на истражувањето, Лесли Бергер, Лан Гуо, Келси Метјуз и Бредли Руфл, спровеле лабораториски и онлајн експеримент во кој учесниците биле изложени на различни работни ситуации. Истражувачите анализирале како понудата на пари за заминување влијае врз нивните одлуки, во зависност од степенот на поврзаност со организацијата.

Најголемо влијание понудата имала врз оние кои биле умерено поврзани со компанијата. Вработените кои најмалку се идентификувале со организацијата и онака биле посклони да заминат, додека оние кои биле најмногу поврзани со неа главно сакале да останат.

Финансискиот поттик најмногу влијаел врз луѓето кои се наоѓале меѓу овие две групи, односно оние кои сè уште не биле целосно сигурни дали сакаат да продолжат со работата.

Оние што ја одбиваат понудата може да станат помотивирани

Интересен е и резултатот поврзан со учесниците кои одбиле да земат пари за да се откажат од задачата. Според истражувањето, по одбивањето тие вложувале повеќе труд во работата отколку пред да ја добијат понудата.

За работодавачите, ваквиот пристап би можел да биде корисен не само за препознавање на вработените кои навистина сакаат да останат, туку и за зголемување на нивната ангажираност.

Слични резултати покажало и друго истражување, објавено во март во списанието „Journal of Behavioral and Experimental Economics“. Во онлајн лабораториски експеримент со 1.000 учесници, на една група ѝ биле понудени пет швајцарски франци за да се откаже од задачата.

Учесниците кои ја одбиле понудата завршиле, во просек, 33 отсто повеќе задачи од контролната група, на која не ѝ биле понудени пари за откажување.

Според авторите, парите што учесниците одлучиле да не ги земат можеби станале своевидна референтна точка врз основа на која ја проценувале вредноста на продолжувањето со работата.

Сепак, истражувачите предупредуваат дека експериментот не овозможува целосно да се утврди дали зголемениот труд е резултат на дополнителната мотивација или, пак, на фактот дека по понудата останале токму оние кои и претходно биле подготвени да вложат повеќе напор.

Дополнително, станува збор за експериментални услови, па за да се утврдат долгорочните ефекти би било потребно следење на реални вработени и деловните резултати на компаниите што применуваат вакви програми.

Од 2.500 до 5.000 долари за заминување

Компанијата „Trainual“ ја претставила својата програма во јануари 2022 година. Програмата започнала во мај 2020 година со понуда од 2.500 долари, која подоцна била удвоена.

Според тогашното соопштение на компанијата, пред зголемувањето на износот ниту еден вработен не ја прифатил понудата за заминување.

Основачот на компанијата, Крис Ронцио, објаснил дека раното разделување со вработен кој не се гледа во организацијата предизвикува помала штета за работењето отколку неговото заминување по една година.

Поголемиот износ требало да им овозможи на оние кои ќе одлучат да заминат полесно да го пребродат периодот додека бараат нова работа.

„Trainual“ се угледала на компанијата „Zappos“, која применувала слична практика за време на почетната обука на нововработените.

Овој пристап го користи и „Amazon“. Основачот Џеф Безос во писмо до акционерите од 2013 година опишал програма во рамките на која на вработените во логистичките центри еднаш годишно им се нуделе пари за да ја напуштат компанијата.

Почетната понуда изнесувала 2.000 долари, а потоа се зголемувала за по 1.000 долари секоја година, до максимум 5.000 долари.

Безос објаснил дека долгорочното останување на работно место на кое човек не сака да работи е штетно и за вработениот и за компанијата.

Замената на вработените може да чини многу повеќе

Една од причините поради кои компаниите размислуваат за вакви програми се високите трошоци за замена на вработените.

Според проценките на компанијата „Gallup“, замената на работник на оперативна позиција чини приближно 40 отсто од неговата годишна плата. Кај стручните лица на технички позиции, трошокот достигнува околу 80 отсто од годишната плата, додека замената на раководител може да чини колку две негови годишни плати.

Овие трошоци не се однесуваат само на објавувањето оглас за ново работно место. Тие ги опфаќаат и процесот на регрутирање, изборот на кандидат, обуката и времето потребно новиот вработен целосно да се вклучи во работата.

Доколку работодавачот навреме препознае дека некој вработен сака да замине, може да избегне дел од идните трошоци за обука и интеграција. Од друга страна, сепак, ќе треба да најде замена и да го организира работењето додека не вработи соодветен кандидат.

Затоа, еднократната исплата треба да се спореди со потенцијалните трошоци што би произлегле од продолжување на работниот однос.

Сепак, ваквите програми отвораат и пошироко прашање за условите за работа. Според ставовите на основачот на „Trainual“, компаниите од кои често заминуваат вработените треба да проверат дали ги исполнуваат ветувањата дадени при вработувањето.

Понудата на пари за заминување може да биде начин за побрзо препознавање на вработените кои не се соодветни за одредена позиција, но честото заминување на работници може да укажува и на проблеми со управувањето, платите или работните услови.

Извор: Bankar.me