70 % од лидерите нема да вработат некој кој нема ВИ вештини: Тие се клучот за напредокот
Вештачката интелигенција (ВИ) може да замени некои работни места, но исто така може да ви овозможи и конкурентска предност на работното место.
Речиси сите менаџери, 96 %, чувствуваат итност да ја инкорпорираат вештачката интелигенција во своите деловни процеси, покажува истражувањето на Slack Workforce Lab од март 2024 година, на повеќе од 10,000 професионалци.
Но, ако чувствувате дека сте во конфликт со новата технологија, не сте сами. Се чини дека истражувачите не можат да се согласат околу тоа дали и како вработените ја користат ВИ. Некои извештаи тврдат дека професионалците се возбудени и експериментираат со ВИ, додека други велат дека поголемиот дел од возрасните не се обиделе да ги користат алатките базирани на ВИ на работните места или не им веруваат.
Без оглед на тоа каде се наоѓате во врска со вештачката интелигенција, луѓето кои нема да научат да ја користат ризикуваат да изгубат шанса за кариера во однос на оние кои тоа го прават, покажало новото истражување на Microsoft и LinkedIn.
Вештините на вештачката интелигенција би можеле да се натпреваруваат со работното искуство во одлуките за вработување – и тоа не само во технологијата.
Речиси 70 % од лидерите велат дека нема да вработат никого без ВИ вештини и дека попрво би вработиле некој помалку искусен кандидат со вештини од областа на ВИ отколку поискусен работник без такви вештини, се наведува во извештајот кој анкетирал повеќе од 30,000 луѓе во 31 земја.
„Учењето на основните вештини на вештачката интелигенција – како брз инженеринг, машинско учење е најдобро осигурување за зголемување на вашата конкурентност во однос на луѓето кои можеби имаат повеќе искуство“, вели Аниш Раман, потпретседател и експерт за работна сила во LinkedIn, за CNBC Make It.
Обучување на вработените за ВИ
Некои компании, вклучувајќи ги Google и Amazon, најавиле вложувања и едукација на својата работна сила за вештините на вештачката интелигенција, но таквите иницијативи не се норма: само 25 % од компаниите планираат да понудат обука за генеративните ВИ алатки како што се ChatGPT и Microsoft Copilot, се вели во извештајот на Microsoft и LinkedIn.
Постојат десетина бесплатни онлајн курсеви кои луѓето можат да ги користат за учење за вештачката интелигенција кои ги нудат компаниите како што се IBM и Google и Ivy League институциите како што се Универзитетот Харвард и Универзитетот во Пенсилванија.
Microsoft многу се обложува на ВИ. Во мај технолошкиот гигант најавил дека ќе вложи 3,3 милијарди долари во наредните четири години во изградба на нови инфраструктурни облаци и вештачка интелигенција.
„По помалку од две години откако генеративната вештачката интелигенција избила на сцена, гледаме дека оваа технологија е вткаена во работната структура во широк спектар на индустрии. Ова се случува во клучен момент кога притисокот, обемот и темпото на работа поради пандемијата со Ковид – 19 едвај попуштиле. Вработените се преоптоварени и се обраќаат за помош на ВИ“, рекла Колет Сталбаумер, генерална менаџерка на Microsoft Copilot и ко-основачка на Microsoft WorkLab.
Особен пораст на усвојување на работните места забележале генеративните алатки базирани на вештачка интелигенција, со удвојување на употребата во последните шест месеци, известуваат Microsoft и LinkedIn.
Не експериментираат само програмерите и инженерите со овие алатки: архитектите, проект менаџерите и административните помошници се меѓу професионалците кои најмногу сакаат да го изградат своето знаење за вештачка интелигенција.
Не-технолошките индустрии, вклучувајќи ги здравствената заштита, финансии и маркетинг, брзо ја усвојуваат ВИ технологијата за да ги поедностават деловните операции и да ја зголемат продуктивноста, додала Сталбаумер, создавајќи голема побарувачка и нови прилики за работа за професионалците кои се вешти во тоа.
Генерацијата Z би можела да ја користи ВИ за да ги забрза своите кариери
Како што сѐ повеќе лидери бараат ВИ вештини од новите вработени, помладите кандидати со познавањето на вештачката интелигенција имаат поголем пристап кон можностите за работа во однос на своите поискусни врсници без тие вештини и го забрзуваат своето подигање на корпоративната скала.
Вработените од генерацијата Z, со оглед на тоа дека пораснале во дигиталниот свет, поверојатно е дека ќе ги користат овие алатки на работа повеќе од нивните колеги милениумци, генерацијата X и бумерите.
Дополнително, 77 % од лидерите велат дека талентите во раната кариера со ВИ вештини ќе добијат поголеми одговорности на работа, покажуваат податоците на Microsoft и LinkedIn.
Вештачката интелигенција би можела да им помогне на младите професионалци да напредуваат во кариерата така што ќе им овозможи побрз пристап прилагоден на советите за кариера, истражување на пазарите и другите увиди базирани на податоците кои им овозможуваат да се чувствуваат посигурно и покомпетентно на своето работно место.
Лидија Логан, потпретседателка на IBM за глобално образование и развој на работната сила, очекува дека брзата интеграција на вештачката интелигенција на работните места ќе предизвика значајни промени во работните места на почетните нивоа.
„Кога размислувам за првата работа која ја имав, она што го работев беше јавување на телефон, организирање на фајлови. На тој начин сѐ уште работат многу луѓе. Поголемиот дел од тие административни задачи сега можат да се автоматизираат со помош на вештачката интелигенција, што остава простор на почетниците да ги преземат оние одговорности кои би можел да ги има некој едно или дури два нивоа над нив на корпоративната скала“, рекла таа.
Извор: BIZLife.rs
Фото: Shutterstock
