СветСиндикат

Франција пред нов бран протести: Стотици илјади луѓе излегуваат на улиците, синдикатите бараат повисоки плати

Франција се подготвува за нов бран протести, откако синдикатите повикаа на национален штрајк на вработените во јавниот сектор, барајќи зголемување на платите. Протестите се одржуваат и покрај напорите на владата да ги намали тензиите во земјата, каде што демонстрациите продолжуваат веќе подолго време.

Од вкупно 5,8 милиони вработени во францускиот јавен сектор е побарано да се мобилизираат, откако преговорите со министерот Себастијан Лекорни во петокот не ги задоволија синдикатите. Тие бараат зголемување на платите за сите вработени, особено по неодамнешното покачување на минималната плата во приватниот сектор.

Ова е третпат од септември да се организира заеднички ден на протести и штрајкови во јавниот сектор. На еден од претходните протести, одржан во текот на овој месец, учествуваа стотици илјади луѓе, а во неколку градови дојде и до судири при кои полицијата употреби солзавец.

По состанокот организиран од Лекорни, уште неколку синдикати се приклучија на повикот за протест. Нивните претставници го напуштиле состанокот со образложение дека предложените мерки не ја решаваат итноста на проблемот со платите.

Во Париз главниот протестен собир треба да започне во 14 часот, додека низ целата земја се планирани десетици други собири.

Според полициски извор кој зборувал за француската новинска агенција АФП, во главниот град се очекува учество на меѓу 40.000 и 80.000 демонстранти, додека на национално ниво се очекува бројката да достигне меѓу 220.000 и 300.000 луѓе.

Втората најголема економија во Европската Унија повеќе од еден месец е погодена од блокади на средни училишта и протести поради високите трошоци за живот. Незадоволството се засилува во пресрет на претседателските избори следната година, на кои крајната десница се надева дека ќе ја преземе власта.

На протестите ќе им се приклучат и младинските синдикални организации, како и активисти од движењето „Жолти елеци“. Ова следува по демонстрациите одржани за време на викендот, на кои граѓаните изразија незадоволство од повеќе прашања, од инфлацијата до предложениот закон за полицијата.

Иако протестите главно поминале мирно, регистрирани се изолирани инциденти на насилство, како и обвинувања за полициска бруталност.

Француските власти воведоа ограничувања за непријавени собири во близина на неколку училишта и универзитети во Париз, а привремено ја забранија и продажбата на пиротехнички средства поради стравувањата од можни насилства за време на протестите.

Протестите се одржуваат во период кога Франција, под притисок да го намали буџетскиот дефицит, забрзано го усвојува буџетот за 2027 година.

Вработените бараат зголемување на платите по години стагнација

Вработените во јавниот сектор сакаат да извршат притисок врз владата за да ја одмрзне платната скала според која се пресметува нивната основна плата.

Во предлог-буџетот, владата четврта година по ред не предвидува општо зголемување на платите.

Синдикатите сметаат дека ова е неприфатливо и проценуваат дека од 2017 година досега јавните службеници изгубиле 16 проценти од куповната моќ.

Поради инфлацијата и долгогодишното отсуство на општо зголемување на платите, сè поголем број вработени во јавниот сектор завршуваат со примања на или блиску до нивото на минималната плата.

Незадоволството од животниот стандард и платите продолжува да ја зголемува социјалната тензија во Франција.

Извор: Vjesti.ba