Ова е најплатената професија во Хрватска: Просечната плата е 3.657 евра

Анестезиолозите, пилотите, ИТ архитектите, „lead developer“-ите и лекарите се на врвот на листата на најплатени занимања во Хрватска, со примања далеку над државниот просек. Од друга страна, најниско платени се работниците во услужните и помошните дејности, како што се шивачите и фризерите, покажува анализата на порталот MojPosao.

Според податоците на сервисот MojaPlaća, во 2025 година просечната месечна нето плата во Хрватска, со вклучени додатоци, изнесувала 1.538 евра. Медијалната плата изнесувала 1.430 евра, што значи дека повеќе од половина од вработените земаат плата пониска од просекот.

„Во последните пет години е забележана и најмала разлика меѓу просечната и медијалната плата. Тоа укажува дека примањата на работниците со пониски плати растеле побрзо и дека се приближуваме до точка во која најголем број граѓани остваруваат приходи блиски до просекот“, се наведува во анализата.

Најголемиот дел од вработените во Хрватска, околу 38 отсто, и понатаму се во платниот распон од 1.000 до 1.500 евра месечно. Плата пониска од 1.000 евра во 2025 година примале 12 отсто од граѓаните.

Анестезиолози над 3.600 евра, шивачи под 900

Анестезиолозите, пилотите, ИТ архитектите, „lead developer“-ите и лекарите се најплатените професии во земјата. Конкретно, анестезиолозите во просек заработуваат околу 3.657 евра месечно, пилотите 3.246 евра, а ИТ архитектите 2.823 евра. Меѓу највисоките примања се и лекарите со просечна плата од 2.729 евра.

На спротивниот крај од спектарот се најслабо платените занимања. Шивачите во просек заработуваат 864 евра месечно, фризерите 962 евра, чистачите околу 963 евра, а кројачите и хигиеничарките околу 984 евра.

ИТ индустријата и понатаму на врвот

Гледано по дејности, највисоки плати и натаму има ИТ индустријата, со просечни примања од 1.789 евра, што е околу 16 отсто над националниот просек.

Надпросечни плати има и во финансискиот сектор и осигурувањето, со просек од 1.622 евра, како и во секторот за производство и дистрибуција на енергија, нафта, вода и отпад, каде просечната плата изнесува 1.632 евра. Во градежништвото, архитектурата и недвижностите, платите се околу 1.612 евра.

Под националниот просек се јавната управа и државната администрација со просек од 1.526 евра, како и транспортот, логистиката, складирањето и поштенските услуги, заедно со здравството и социјалната заштита, каде платите изнесуваат околу 1.506 евра. Образованието и науката се осум отсто под просекот, со плата од 1.412 евра.

Државата најмногу ги зголемувала платите

Најголем раст на платите е забележан во јавната и локалната самоуправа, каде примањата пораснале за 20 отсто, како и во државните компании, со раст од 18 отсто. Сепак, највисоки плати и понатаму се исплаќаат во приватни компании во странска сопственост, каде просечните примања изнесуваат 1.686 евра.

Разлики постојат и според големината на компанијата. Во микро компании со до 10 вработени, платите во 2025 година изнесувале 1.383 евра. Во големите компании со над 1.000 вработени, платите се околу пет отсто над просекот и пораснале за 16 отсто во однос на претходната година.

Најбрз раст во Крапинско-загорската жупанија

Најниски плати и понатаму има во источниот дел на земјата. Во Пожешко-славонската жупанија платите се 17 отсто под просекот, а во Вуковарско-сремската и Вировитичко-подравската по 16 отсто, со просек под 1.300 евра.

Со просечна нето плата од 1.662 евра, Загреб е град со највисоки примања во Хрватска. Медијалната плата во главниот град изнесува 1.520 евра.

Најизразен раст на платите во однос на 2024 година е забележан во Крапинско-загорската жупанија, каде просечните плати пораснале за 20 отсто и достигнале 1.453 евра.

Извор: Index.hr