Пловечка палата се продава за половина цена! Бродот што учествувал во Денот Д, ги угостил Тито и Кенедиеви – денес може и да се изнајми, еве за колку

Жаклин Кенеди, Мерилин Монро, Елизабет Тејлор, Џон Вејн, Френк Синатра, Грејс Кели, Винстон Черчил, Тито… сите овие историски личности во одреден момент биле на исто место. Иако на прв поглед неспоиво друштво, ги поврзувал еден брод.

Секако, не станува збор за обичен брод, туку за луксузната јахта на грчкиот бродски магнат Аристотел Оназис. Малку пловила можат да раскажат приказна како легендарната јахта „Кристина О“.

Купена како отпишан брод за 34.000 долари

Работниот век на јахтата започнал во 1943 година во канадско бродоградилиште, каде што била изградена како воена фрегата HMCS Stormont. За време на Втората светска војна служела во Битката за Атлантикот и при искрцувањето на Денот Д во Нормандија.

По војната, судбината ѝ доделила сосема поинаква улога. Оназис го купил отпишаниот воен брод за само 34.000 долари, а потоа вложил четири милиони долари за да го претвори во јахта од соништата и симбол на раскош. Името го добила по неговата ќерка Кристина.

„Светските медиуми едноставно полудеа по приказната за Кристина, бидејќи таа беше врвен симбол на луксуз и гламур“, изјавил за CNN брокерот Тим Морли, кој ја води продажбата на бродот.

Оваа јахта не била само парче метал на вода, туку пловечки симбол на луксуз, сцена за романси и засолниште за најмоќните луѓе во светот.

На должина од 99 метри, германскиот архитект Цезар Пино создал свет на невидена екстраваганција. Најпознат симбол на луксузот бил базенот, чие дно украсено со мозаици од минојски бикови со притискање на копче се претворало во подиум за танцување.

Кабините за гостите биле именувани по грчки острови, а апартманот на Оназис се состоел од три простории, вклучувајќи бања со сина мермерна када и мозаици инспирирани од палатата Кносос.

Оназис ја оженил Џеки Кенеди на бродот

Јахтата била сцена и на некои од најпознатите романси на 20 век. Токму на неа во 1959 година започнала љубовната врска меѓу Оназис и оперската дива Марија Калас, која на бродот пристигнала со својот сопруг.

Џон Ф. Кенеди на истиот брод разговарал со Винстон Черчил, а неговата сопруга Џеки Кенеди подоцна станала сопруга на Оназис. По свадбата, приемот бил организиран токму на „Кристина“.

Цената на „пловечкиот луксуз“

Оваа пловечка историска ризница денес се продава за речиси половина од првичната цена. Бараната сума е намалена од 90 милиони на 52 милиони евра.

„Имавме интерес, но немаше договор“, изјавил Морли за CNN од Нафплион, Грција, за време на Медитеранскиот саем за јахти.

Покојниот ирски бизнисмен Ајвор Фицпатрик, кој беше сопственик на јахтата во последните години, уживал во нејзиното поседување, но неговата вдовица Сузан ја намалила цената за побрзо да ја продаде.

По смртта на Оназис во 1975 година, сјајот на „Кристина“ почнал да бледнее. Неговата ќерка ја подарила на грчката влада, по што била преименувана во „Арго“ и оставена да пропаѓа.

Со години стоела во поморска база кај Пиреја, сè додека во 1998 година не ја купил Џон Пол Папаниколау, пријател на семејството Оназис. Во обновата вложил повеќе од 50 милиони долари, а проектот бил доверен на хрватското бродоградилиште „Виктор Ленц“ во Риека.

Само 40 проценти од оригиналниот труп останале недопрени, додека остатокот бил целосно реставриран. Потоа повторно го добила името „Кристина О“.

Од реновирањето наваму, јахтата функционира како луксузен чартер брод. Германската манекенка Хајди Клум ја изнајмила за свадбата со својот сопруг Том Каулиц на Капри во 2019 година.

Јахта што технички не е јахта

Бродот има 17 кабини, а според правилата на Меѓународната поморска организација, „Кристина О“ технички не се смета за јахта бидејќи класичните јахти се ограничени на 12 патници. Со капацитет за речиси трипати повеќе луѓе, официјално е класифицирана како патнички брод.

„Буквално ниедна друга јахта не може да го понуди тоа“, вели Морли.

„Кога луѓето ќе се качат на бродот, сите чувствуваат емоционална реакција. Тоа е поинакво искуство. Речиси магично.“

Сепак, и покрај луксузот, денешната верзија на „Кристина О“ не е целосно прилагодена на современите купувачи. Нејзиниот тесен дизајн, првично создаден за брзина во воени услови, не нуди толку голем внатрешен простор како модерните суперјахти.

Дополнително, на продажбата влијаат и светските кризи – војната во Источна Европа, конфликтите на Блискиот Исток и економскиот пад во Европа.

Луксуз за 700.000 евра неделно

Современата верзија на бродот располага со бројни додатоци: флајборд, воден тобоган, џет-ски, кајаци, SUP даски и опрема за нуркање. За релаксација има џакузи, теретана, спа-центар, лифтови и детска игротека.

Цената за изнајмување изнесува околу 700.000 евра неделно во сезоната од мај до септември, додека во зимскиот период достигнува 740.000 евра. Со дополнителните трошоци, седумдневното крстарење може да чини повеќе од 870.000 евра.

Јахтата плови низ Карибите и Медитеранот, вклучувајќи ги Хрватска, Италија, Грција, Франција, Црна Гора и Турција.

Инаку, „Кристина О“ беше дел од сценографијата на филмот „Триаголник на тагата“, а била користена и во филмот „Марија“ за животот на Марија Калас, во кој главната улога ја толкува Анџелина Џоли.

Без разлика дали ќе добие нов сопственик или не, „Кристина О“ останува вечен симбол на едно време и доказ дека од воен отпад може да се создаде вистинска легенда.

Извор: Poslovni dnevnik / Blic.rs