„Се убиваме од работа за 950 евра, а нѐ понижуваат“: Хигиеничарка открива какви се условите за работа во хрватска болница

Недостигот од хигиеничари, тешките услови за работа, големиот обем на обврски и ниските плати се меѓу најголемите предизвици со кои се соочуваат болниците во Хрватска. На ова неодамна предупреди и синдикатот на Клиничкиот болнички центар (КБЦ) Загреб, барајќи итна корекција на коефициентите за плата и ревизија на системот на плати во јавниот сектор.

По овие реакции, хигиеничарка од една загрепска болница за порталот Zagrebinfo ги опиша условите во кои работат вработените задолжени за одржување на хигиената во операционите сали. Таа тврди дека нивните обврски одамна го надминале чистењето, додека платата останала ниска – околу 950 евра месечно.

„Дали знаете што сѐ работат хигиеничарките во операционите сали, а се платени исто како и сите други? Не ни се признава средното образование и нѐ водат како неквалификувани работници. Болниците немаат ниту платен топол оброк. Работиме во операциони сали и сме изложени на зрачење, а за тоа не добиваме никаква надомест“, вели таа.

Обврските не завршуваат со чистење

Според нејзиното сведоштво, покрај одржувањето на хигиената во операционите сали, хигиеничарките секојдневно извршуваат и бројни други задачи.

„Во рамките на операциониот блок има кујна каде што персоналот јаде и пие кафе. Ние ги собираме и ги миеме садовите, иако тоа не е наша работа. Ако укажеме на тоа, следуваат негативни реакции“, вели соговорничката.

Таа додава дека секојдневно ги перат кломпите на медицинскиот персонал, ја чистат кујната, го изнесуваат отпадот, носат тешки вреќи со отпад по ортопедски интервенции, како и дека се грижат за поделба на појадок, ручек и вечера.

„Сето тоа и уште многу повеќе го работиме за плата од 950 евра“, истакнува таа.

„Притисокот е сѐ поголем“

Хигиеничарката тврди дека работниот притисок постојано расте, а дел од вработените веќе добиваат опомени пред отказ затоа што не сакаат повеќе да работат во операционите сали.

„Се убиваме од работа. Луѓето добиваат опомени пред отказ затоа што повеќе не можат да издржат. Нѐ понижуваат“, вели таа.

Според неа, вработените не добиваат доволна поддршка ниту од раководството, а инспекциските контроли, како што тврди, најчесто се најавени однапред.

„Каде се инспекциите? Доаѓаат однапред најавени и по договор. Тоа е навистина разочарувачки“, додава соговорничката.

Инаку, синдикатот на КБЦ Загреб неодамна предупреди дека болницата се соочува со сериозен недостиг на хигиеничари и побара итни мерки за подобрување на нивниот статус, со цел да се задржат постојните работници и да се привлечат нови кадри.

Извор: Telegraf Biznis