Трговците ќе го послушаат ли апелот на Мицкоски за намалување на маржите?

Цените посебно на основните прехрамбени производи во Македонија, не мируваат. По пазарите, по маркетите, граѓаните забележуваат чести промени. И да, цените најчесто одат само нагоре.

До кога ќе е вака, па нели инфлацијата е скротена? Ќе реагира ли државата?

Премиерот Христијан Мицкоски завчера се обиде да внесе доза на оптимизам со изјавата дека во последниве месец – два инфлацијата се смирува и дека сега е на 3 проценти. Но, сепак додаде дека цените на прехрамбените производи треба да бидат пониски и апелира до трговците максимално колко што можат да ги намалат маржите, а Владата нема да интервенира во цените.

-Ние сме пазарна економија, пазарот ги диктира цените. Ако влеземе во една политика на ограничување, тогаш видовте какви резултати ни даде таа политика – ни даде спротивни ефекти од тие што ги очекувавме, изјави Мицкоски.

Го слушнаа ли апелот трговците? Сега тие се на потег.

Премиерот Мицкоски се реши за апели, а блиски држави во регионот пак преземаат мерки за ограничување и намалување на цените. Во Србија денеска е промовирана акција на државните и трговските синџири „најдобра цена“, во која во текот на септември и октомври ќе бидат намалени цените на 81 производ во просек за 25 проценти. Со акцијата која ќе трае два месеца- септември и октомври, како што објавија српските медиуми, се обезбедува месечна заштеда на граѓаните  од 8.000 до 22.000 динари. Во Црна Гора, пак, се ограничија маржите на 66 прехранбени производи и по што се очекува да поевтинат 1.000 производи. Одлуката не се однесува на малите бизниси и тие ќе бидат изземени од неа, а ќе важи до 31 јануари 2025 година. Во однос на претходната кампања „Ограничени цени“, сега на листата се додаваат и овошје, зеленчук, нешто повеќе видови месо и средства за лична хигиена…