Недела на хаос: подгответе се за колапс на германските автопати

Ако во наредните денови планирате патување со автомобил низ Германија, подгответе се за сериозни сообраќајни метежи и застои. Синдикатот на јавните служби Verdi прогласи „недела на штрајк“ во федералната компанија Autobahn GmbH, која е задолжена за управување и одржување на автопатите.

Штрајкот нема да ги погоди само депоата за одржување и административните центри, туку и критичните тесни грла како тунелите. Причината е тоа што преговорите за платите се наоѓаат во, како што наведува синдикатот, „неприфатлива состојба“.

„Ако на Autobahn GmbH ѝ е потребен сигнал за преговорите да продолжат конструктивно, ќе го добие“, изјави главниот преговарач на Verdi, Оливер Бандош. Тој порача дека сите ограничувања и можни парализи на автопатите ќе бидат исклучива одговорност на работодавачот.

Протестите започнаа денес во десет подружници на Autobahn GmbH, како и во федералното седиште во Берлин. Ситуацијата дополнително ќе ескалира утре, кога во штрајк ќе стапат депоата за одржување на автопатите низ целата земја. Услугите може да бидат откажани, одложени или само делумно достапни, а во некои делови од Германија се најавуваат и снежни врнежи.

Најголемите нарушувања се очекуваат во четврток, кога штрајкот ќе ги опфати и клучните контролни центри за тунелите.

Синдикатот Verdi бара зголемување на платите од седум проценти за околу 14.000 вработени во Autobahn GmbH, односно најмалку 300 евра месечно. Исто така, приправниците треба да добијат дополнителни 300 евра, со договор на определено време до 12 месеци. Работодавачот, пак, нуди договор од 29 месеци, што синдикатот го смета за предолго. Verdi предупредува и дека моментално има околу илјада непополнети работни места.

Минатата недела, истиот синдикат блокираше голем дел од Германија со штрајкови во јавниот превоз. Сега возачите се предупредуваат да бидат подготвени за можен колапс на германските автопати во наредните денови.

Извор: vecernji.hr