Недостигаат 5.000 воспитувачки во хрватските градинки, кога нема друг, на конкурс се примаат и фризерки!
Некои хрватски родители се најдоа во проблем затоа што нивните деца не добија место во градинка, а некои градинки имаат проблем со недостиг од воспитувачи. Според проценките, на системот му недостигаат дури 5.000 едукатори, па на нивно место често се вработуваат таканаречени непрофесионални замени, пренесува ХРТ.
Во загрепската градинка „Травно“ немаат проблем со недостиг на стручен кадар, но јасно ги гледаат промените во системот низ годините. Претходните години на еден конкурс се пријавија 20/25 воспитувачки, сега бројката е од 10 до 12/13, во зависност од периодот кога е објавен конкурсот“, изјави за ХРТ Марија Балиќ, директорка на градинката „Травно“. Ова е очекуван тренд, велат во Синдикатот на просветните работници и предупредуваат дека професијата со години е маргинализирана.
Од здружението кое ги собира просветните работници, нагласуваат дека не биле изненадени што минатата академска година факултетите не успеале да ги пополнат зголемените уписни квоти. Ова го потврдува наставничката која останува анонимна поради евентуална непријатност.
„Претходно работев во групи деца каде што децата беа во многу мали соби, а имаше многу голем број деца. Тоа значи дека државниот педагошки стандард е грубо нарушен“, вели една наставничка. Нејзините колеги често биле т.н непрофесионални замени, на пример фризери.
„Јас не можам да влезам во фризерница и да речам дека ќе му ја скратам косата на муштеријата. Ќе ми речат дека не можам, дека немам соодветно образование. А од друга страна, секој сега може да биде воспитувач. Дали е тоа фер за луѓето кои се школувале три или пет години“, вели воспитувачката. Во Министерството за наука и образование се свесни за проблемот и се надеваат дека можноста за преквалификација ќе помогне да се реши. Во детските градинки во Хрватска во моментов работат околу 15.000 воспитувачи, но за да функционира системот потребни се уште најмалку 5.000.
