Не e само Македонија, секој четврти Европеец е во финансиска криза

Животот станува се поскап. Статистика измери инфлација од близу 20% во октомври. Главна причина за ова е кризата која владее во Европа и светот поради енергенсите, но и поради поскапиот увоз и прозиводство на продукти како последица на војната во Украина пишува цивил.мк.

Синдикатот пресмета потрошувачка кошница од 43.000 денари или со вклучена инфлација над 51.000 денари. За една година поскапело речиси се. Најмногу храната и енергенсите. Лебот и житатата се продаваат по двојно повисока цена.

Над 40% зголемување е регистрирано и кај млекото, сирењето, јајцата, маслата, мастите, течните горива. Цврстите поскапеле за 38,5, топлинската енергија за 30, гасот и електричната над 20.

За да се ублажи ценовниот удар на сила е мерката ограничени маржи на основните прехранбени производи. Но, цените и натаму растат. Затоа експертите препорачаа – по примерот на соседните земји, владата да ги замрзне цените на производите. На тој начин, според нив, ќе се заузда инфлацијата, а народот ќе има сила да го истурка месецот.

Поевтина струја за прехрамбената индустрија

Владата пак не ги замрзнува цените, но за компаниите што произведуваат основни прехранбени производи како масло за јадење, леб и пекарски производи, брашно, млеко и млечни производи, како и компании од месната и живинарската индустрија ќе плаќаат електрична енергија по цена од 80 евра за мегават час. Тоа е повеќе од двојно поевтино од редовната цена на пазарот за мегават час.

Оваа мерка на производителите на основни прехранбени производи ќе им овозможи да имаат предвидливост, стабилна и поевтина струја, што ќе влијае и врз стабилизирање на цените на финалните производи кои се произведуваат и се продаваат.

Со ваква цена на електричната енергија, крајните цени за потрошувачите треба да се намалат за најмалку 10 отсто. Тоа значи пониски цени за граѓаните, односно заштита на нивниот животен стандард и куповна моќ.

Какви се состојбите во Европа?

Секој четврти Европеец  вели дека е во несигурна финансиска ситуација што ги принудила да се откажат од одредени потреби – како што се загревање на домот или јадење оброци.

Извештајот, објавен оваа недела од невладината организација за борба против сиромаштијата Secours Populaire во соработка со Ипсос, покажа дека 62 отсто од анкетираните Европејци веќе го ограничиле своето патување, а 47 отсто се откажале од загревање на својот дом и покрај студот.

Дваесет и девет проценти од учесниците во истражувањето исто така рекле дека прескокнале оброк кога биле гладни.

Студијата – спроведена за организацијата од страна на институтот за истражување на пазарот Ипсос – анкетираше околу 6.000 лица на возраст од 18 и повеќе години од шест земји: Германија, Франција, Грција, Италија, Полска и Обединетото Кралство.

Повеќе од еден од двајца Европејци чувствуваат дека цените растат и нивната куповна моќ се намалува.

Овој тренд предизвикува загриженост бидејќи ситуацијата може да се влоши.

54% од нив сметаат дека нивната куповна моќ е намалена во последните три години. Меѓу нив, повеќе од секој четврти вели дека куповната моќ дури и е многу намалена (26%).

 Грција во тешка состојба

Оваа ситуација е особено тешка во Грција, каде 51 отсто од испитаниците велат дека се во ваква ситуација.

Педесет и еден процент од Грците изјавиле дека се соочуваат со тешкотии, во споредба со 24 проценти од Французите и 18 проценти од Германците.

-Со зголемените цени, енергетската криза и последиците од војната во Украина, условите за живот на многу Европејци се влошија во 2022 година. Оваа ситуација е уште потешка бидејќи следуваат две години во кои животниот стандард беше обележан со шокот од здравствената криза Ковид-19, вели Secours Populaire.

Семејствата се особено погодени, при што речиси секој втор родител веќе се откажал од заминувањето на своето дете на одмор или запишувањето на воннаставна активност.

За колку поскапе храната

Една третина од испитаниците рекле дека не секогаш можат да му дадат на своето дете разновидна исхрана.

Со цел да им обезбедат добри услови за живот на своите деца, три четвртини од родителите изјавиле дека се лишуваат од слободни активности.

Поттикнати од зголемената цена на електричната енергија, потрошувачките цени во еврозоната се зголемија за 10 отсто во септември – најсилното зголемување од почетокот на евиденцијата.

Во Франција, инфлацијата минатиот месец го достигна највисокото ниво од 1985 година. Особено цените на храната пораснаа за речиси 12 проценти на годишно ниво, додека цените на енергијата се зголемија за речиси 20 проценти.

Бидејќи инфлацијата продолжува да расте во Европа, 55% од Европејците сметаат дека постои значителен ризик дека ќе се најдат во нестабилна финансиска ситуација во наредните месеци. Тие имаат мала финансиска слобода, а 64% изјавиле дека не знаат за кои трошоци да направат компромиси, бидејќи веќе скратиле сè што можат.

Згора на тоа, бидејќи ситуацијата во однос на поскапувањата се чини дека не се подобрува, многу Европејци се загрижени за нивната способност да се справат во иднина.