Хрватската државна статистика ja објави просечната плата во земјата, од лани пораснала за 10%

Хрватскиот Централен завод за статистика (ГСО) денеска ги објави своите најнови статистики, кои покажуваат дека просечната месечна нето-плата по вработен во Хрватска за ноември лани, која е исплатена во декември, изнесува 1.366 евра, јави „Пословни.хр“.

Во споредба со просечната плата во ноември 2023 година, износот е номинално поголем за 13,1 отсто, а реално за 10 отсто.

Споредено со заработката за претходниот месец, октомври 2024 година, просечната нето-плата за ноември е номинално повисока за 1,9 отсто, а реално за 1,5 отсто.

Платите во ноември, кои се исплаќаат во декември, традиционално се под влијание на дополнителните приходи како што се божиќните и годишните бонуси.

Највисока просечна месечна исплатена нето-плата по вработен за ноември 2024 година е исплатена во авионскиот превоз – 2.133 евра, а најниска во производството на облека – 863 евра, соопшти државната статистика.

Фото: Freepik