Германија ги затвора вратите: Се воведуваат строги мерки на границите

Германија сака да стави крај на илегалната миграција и планира да ги заостри условите за добивање германско државјанство.

Покрај тоа, според пишувањата на германските медиуми, лицата кои имаат германски пасош, а кои повикуваат на калифат или шеријатски закон, ќе го изгубат државјанството на оваа земја.

Како што пишуваат германските медиуми, бриселската канцеларија на ЦДУ сака на партиската конференција во Штутгарт (20/21 февруари) да усвои резолуција со која би се овозможило барателите на азил што влегуваат во ЕУ од безбедни трети земји веднаш да бидат вратени на надворешните граници на ЕУ, без никакви контроли.

Потребна правна основа

Во предлогот, во кој германските медиуми имале увид, се наведува дека е потребна правно обврзувачка регулатива на ЕУ за ова да се овозможи. Враќањето на илегалните мигранти на надворешните граници на ЕУ треба да се обезбеди со дополнителен протокол кон Европската конвенција за човекови права.

Потешко до германски пасош

Понатаму, условите за натурализација треба значително да се заострат (вклучително и подобри јазични вештини, најмалку пет години живот без социјална помош, легален престој од најмалку седум години и неосудуваност). Потребното ниво на познавање на јазикот ќе мора да се документира со сертификат и да се провери со усен тест на лице место. Целта е да се откријат оние што нелегално купуваат јазични сертификати.

Го губат правото на германско државјанство

Лицата кои веќе се натурализирани, а кои на демонстрации повикуваат на калифат или шеријатски закон, ќе ги изгубат своите германски пасоши. „Истото мора да важи и ако странски сторители или лица со двојно државјанство бидат осудени за антисемитско кривично дело“, се наведува во предлогот.

Престојот на одбиени баратели на азил и бегалци од граѓански војни во земји во кои граѓанската војна завршила, исто така треба „доследно да се прекине“.

„Германската влада и ЕУ се на вистинскиот пат во борбата против илегалната миграција. Но сега станува збор за тоа работите да се подигнат на следното ниво“, изјави шефот на ЦДУ во Брисел, Тим Петерс.

Бројот на нови барања за азил во Европската унија, Норвешка и Швајцарија нагло опаднал во првата половина од годината, покажуваат податоците на ЕУ објавени во понеделник. Германија повеќе не е на првото место по бројот на баратели на азил, како што беше пред многу години, пренесува Германската новинска агенција (dpa).

Опадна бројот на барања за азил

Европската агенција за азил (EUAA), со седиште на Малта, објави дека во текот на 2025 година, меѓу јануари и јуни, биле поднесени 399.000 нови барања, што е за 114.000 помалку отколку во истиот период во 2024 година.

Тоа претставува пад од 23 отсто. Бројката ги опфаќа сите членки на ЕУ, како и Норвешка и Швајцарија.

Во првите шест месеци од оваа година, Франција беше прва по бројот на барања со 78.000. Следат Шпанија со 77.000, Германија со 70.000 и Италија со 64.000.

Падот на барањата во голема мера се припишува на соборувањето на Башар ал-Асад, што значително го намали бројот на Сиријци кои бараат заштита.

Наместо тоа, најголемата група подносители на барања беа Венецуелците со 49.000 случаи, пред Авганистанците (42.000) и Сиријците (25.000). Речиси сите Венецуелци ги поднеле барањата во Шпанија, каде заедничкиот јазик ја олеснува интеграцијата.

Барањата се намалиле во повеќето големи земји, освен во Франција. Најголем пад е забележан во Германија – 43 отсто, потоа Италија со 25 отсто и Шпанија со 13 отсто.

Извор: b92.net