Ова се моментално десетте најбарани професии во светот

Многумина кои во моментов бараат работа можат да потврдат дека ова е еден од најпредизвикувачките периоди за наоѓање нова можност.

Вработувањето е во пад во голем број индустрии, додека масовните отпуштања во одредени сектори значат дека сѐ поголем број работници се натпреваруваат за ограничен број на слободни работни места.

Сепак, некои професии и понатаму се многу барани. Според извештајот што во средата го објави платформата „Monster“, во текот на третиот квартал се издвоија десетте најбарани занимања меѓу огласите на работодавците. Моментално, најмногу можности отвораат секторите за здравство, логистика, продажба и корисничка поддршка.

Моментално најбарани занимања се:

• Регистрирана медицинска сестра
• Физиотерапевт
• Возач на камион
• Претставник за продажба
• Радиолошки техничар/технолог
• Логопед (терапевт за говор и јазик)
• Доставувач
• Респираторен терапевт
• Работен терапевт (специјалист за рехабилитација)
• Претставник за корисничка поддршка

„Здравството очигледно предничи на оваа листа, дури шест од десетте занимања припаѓаат на оваа област, особено клиничките позиции“, изјави Вики Салеми, експерт за кариера на платформата „Monster“, за CNBC Make It.

Извештајот се заснова на десетици илјади огласи објавени во текот на третиот квартал, а покажува и дека т.н. „суштински професии“, како што се возачи на камиони и доставувачи, и понатаму се одликуваат со стабилност и отпорност на кризи.

Додека некои занимања од листата бараат стручни квалификации или професионални сертификати, други се подостапни за кандидати кои сè уште немаат големо искуство во таа област.

„Ако работите во индустрија во која комуницирате со клиенти, многу е веројатно дека веќе ги поседувате вештините за корисничка поддршка“, објаснува Салеми.

Таа ги советува кандидатите кои сакаат да се испробаат во нова професија, вложувањето во дополнителни вештини (т.н. upskilling) да го сфатат како чекор што може значително да ги зголеми шансите за вработување. Покрај тоа, додава таа, иако некои занимања не се најдоа на оваа листа, сезонското вработување во трговијата и угостителството веќе е во полн ек во пресрет на новогодишните празници.

Без оглед на тоа за која позиција аплицирате, Салеми ги советува кандидатите да ја приспособат секоја апликација на конкретното работно место, наместо да испраќаат масовни пријави на десетици огласи.

„Поентата не е во количината на пријави“, истакнува таа. „Клучот е во фокусираниот пристап – подобро е внимателно да изберете неколку позиции кои навистина одговараат на вашите способности и цели, отколку да аплицирате по случаен избор и да се надевате на најдобар исход.“

Извор: BIZLife.rs