Пожарникарите се соочуваат со прекршување на работничките права додека се борат со пожарите

Пожарникарите денеска информираа дека до нив секојднвено пристигнуваат дојави за прекршување на работничките права во услови кога тие се борат со гасење на пожари низ државата.

– Додека во овие моменти се очекува, а од страна на нашите колеги професионални пожарникари се добива максимално залагање во гаснењето на пожарите и справување со оваа тешка ситуација во која се наоѓа Републиката, дотолку не се покажува од лидерствата на оние кои треба да се грижат за добробитта на секој пожарникар, грижа за неговата/нејзината спремност за делување, за квалитетна работна облека и услови за работа, како и соодветна исплата на со чесен труд заработените парични средства како што им следуваат по закон, велат пожарникарите.

Како пример го посочуваат градоначалникот на Ранковце кој, како што велат, се уште ја држи забраната за работа во трета смена на пожарникарите поради што некои од нив мора да работат и по 40 часа непрекинато.

„За да бидат заштедени парични средства, Општината Ранковце немала дежурни пожарникари во третата смена, па нашите колеги од таа општина на свое лично залагање, некои и по 40 часови непрекинато се борат со страшните пожари на локалното подрачје, иако исплатата на нивниот труд, на овој начин е доведена во прашање“, велат тие. 

Слични делувања, како што наведуваат, се случуваат и на други места низ државата.