ЈП „Стипион“ – Штип со хуманитарна акција; Парите ќе бидат донирани на оние кои им се најпотребни

 

Овде сме пред зградата на Општина Штип, на една од локациите од хуманитарната зона Х1, на еден позитивен настан под мотото: ,, Поплочи го патот до солидарноста – паркирај и донирај! “, а со цел да покажеме како многупати до сега дека Штип е град на солидарноста, град на хуманоста, да ја подигнеме свеста кај граѓаните за користење на овие паркинг позиции и воедно да ја актуелизираме потребата од солидарниот фонд.

Со паркирање во хуманитарната зона Х1, граѓаните ќе донираат дел од средствата во солидарниот фонд, а потоа тие средства ќе се користат за помош на наши сограѓани од ранливи категории и итни случаеви кои имаат ургентна потреба од финансиска помош.

На помош во оваа наша иницијатива повикавме уметници, наставници, активисти, здруженија, родители и дечиња со кои заеднички ќе ги обележиме, исцртаме, обоиме овие позиции со различни цртежи и мотиви и оваа прилика ја користам јавно да им се заблагодарам за нивното учество и несебичен придонес. Јавното претпријатие Стипион обезбеди бои, четки и други потребни материјали за работа, со кои заеднички, преку игра и забава ќе ги разубавиме овие солидарни паркинг позиции, ќе им дадеме посебен карактер, препознатливост и еден урбан лик.

Освен хуманиот аспект, идејата за воведување на овие позиции е овозможување на полесен пристап до паркинг на граѓаните кои имаат ургентни обврски во институциите во централното градско подрачје. Паркингот на овие позиции ќе чини 30 денари за првиот и за секој следен час, а месечните и годишните билети за паркирање нема да важат.

Хуманитарната зона Х1 ќе опфаќа вкупно 131 позиција, на неколку локации во градот, покрај општинската зграда, покрај плоштадот слобода, 3 позиции спроти стоковната куќа НАМА, како и на платформите за паркирање на река Отиња. Секоја локација од хуманитарната зона ќе биде соодветно означена со информативни табли а новина ќе биде можноста за наплата преку банкарска сметка со скенирање на QR code позициониран на таблата.

Ги повикуваме граѓаните да ,,паркираат и донираат” и сите заедно да дадеме поддршка и помош на оние на кои им е најпотребна.

Со почит,

В.Д директор на ” ЈП СТИПИОН 2011″-

Панче Стефановски