2.000 вработени во „Македонска пошта“ излегуваат на штрајк ако за пет дена не се стопира одлуката за 31 ново вработување
На „Македонска пошта“ не ѝ требаат нови 31 вработен во администрација оти не може да ги исплати платите и на сегашните над 2.000 вработени. Синдикатот на „Македонска пошта“ денес побара стопирање на одлуката за новите вработувања и ѝ даде рок на Владата од пет дена за состанок на кој би почнале да се решаваат наталожените проблеми. Доколку Владата нема слух, Боро Велигденов, претседател на Синдикатот на „Македонска пошта“, најави дека излегуваат на штрајк.
„Сакаме јавно да го искажеме револтот на вработените од лошата финансиска состојба во која се наоѓа ‘Македонска пошта’. Стравувавме за иднината на друштвото и за редовната исплата на платите. Платата за јануари ја зедовме на 17, по истекот на законскиот рок, со заем од наш соработник, како што ме известија од Халкбанк. И покрај проблемите со кои се сочуваме, генералниот директор распиша оглас за 31 вработување во администрација, кои се непотребни, имаме превработеност во администрацијата, а со прераспределување може да се покријат потребите. Не би биле против нови вработувања ако се економски издржани и ако се за суштинскиот дел од работењето. Сериозно ни се потребни поштари, шалтерски работници и оператива, имаме недостиг во тој дел, кој е од суштинско значење. Го повикуваме генералниот директор да ја преиспита одлуката за нови административни работници и да ја стопира за не се доведеме во состојба на нередовна исплата на платата. Ќе бараме состанок во Владата, на кој ќе се обидеме да најдеме разрешница на проблемите. Денес ќе го изготвиме барањето, а ќе дадеме рок од пет дена за средба. Се надеваме дека Владата, како сопственик на ‘Македонска пошта’, ќе го прифати нашето барање. Ќе ги преземеме сите законски мерки, протести, штрајк ако нема слух за подобрување на состојбата“, рече Велигденов.
Синдикатот не е задоволен и од дијалогот со генералниот директор. Велигденов потсети дека минатата година за повеќе случаи имале преговори со Владата и со генералниот директор, потпишале и трипартитен договор за соработка и спроведување внатрешни реформи за зголемување на продуктивноста, нова систематизација и целосна реорганизација на работењето, но ништо од договореното не било почитувано.
Во моментот „Македонска пошта“ има над 2.000 вработени, од кои 65 отсто се над 55 години, и по пат на природен одлив се намалува бројот на вработени. Пред пет години Велигденов вели дека имале над 2.220 вработени.
