Економска студија: Паметните телефони можеби придонесуваат за пад на наталитетот

Во многу земји ширум светот бројот на деца по жена е во опаѓање, а додека истражувачите сè уште ги бараат причините за овој тренд, две неодамнешни американски студии посочуваат на неочекуван можен фактор – паметните телефони.

Според нивните наоди, луѓето кои користат паметни телефони имаат помалку социјални интеракции во живо, а со тоа и поретки сексуални односи, што потенцијално влијае врз стапката на наталитет.

Стапката на фертилитет во Соединетите Американски Држави е намалена за 22 проценти од 2007 година наваму. Научници поставиле хипотеза дека овој пад би можел да биде поврзан со појавата на Ајфон, кој беше лансиран токму во истата година.

За да ја проверат оваа теорија, истражувачите од Универзитетот Мидлбери се фокусирале на периодот кога Ајфон во САД бил достапен исклучиво преку телекомуникацискиот оператор AT&T. Тие ги споредувале регионите покриени со мрежата на операторот со областите без таква покриеност и утврдиле дека местата со поголем пристап до Ајфон бележеле поизразен пад на бројот на деца по жена.

„Падот на фертилитетот е особено изразен кај младите жени на возраст од 15 до 24 години и во голема мера го одразува намалувањето на непланираните бремености“, наведуваат авторите на студијата објавена од Националното биро за економски истражувања.

Истражувачите сметаат дека трендот потешко може да се објасни со економски фактори, а повеќе со намалената социјална интеракција и сексуална активност. Според нив, со ширењето на паметните телефони се намалува времето поминато со пријатели лице в лице, додека истовремено расте консумирањето порнографски содржини како можна замена за партнерски односи.

Авторите на студијата, Кетрин Мајерс и Езекиел Хупер, истакнуваат дека пронаталитетните политики кои се потпираат исклучиво на финансиски и економски поттикнувања имаат ограничен ефект.

Дополнителна анализа спровеле економистите од Универзитетот во Синсинати, Нејтан Хадсон и Хернан Москос Боедо. Тие го прошириле истражувањето на 128 земји, користејќи податоци на Светската банка за распространетоста на паметните телефони и стапките на фертилитет кај адолесцентите.

Нивните резултати покажуваат дека падот на наталитетот се забрзува паралелно со ширењето на паметните телефони во различни држави, без оглед на економските и културните разлики меѓу нив.

Во заклучокот на студијата се наведува дека станува збор за „глобален технолошки шок“ кој ги менува општествените навики и меѓучовечките односи низ целиот свет.

Извор: Telegraf Biznis