Фолксваген тоне уште подлабоко? Во опасност четири фабрики, без работа би можеле да останат повеќе од 100.000 луѓе
Надзорниот одбор на германскиот автомобилски гигант Фолксваген денеска расправа за нов план за реструктурирање на компанијата, додека синдикатите и работничките совети организираат протести низ Германија поради можните затворања на фабрики и дополнителни намалувања на бројот на вработени.
Според Bild и други германски медиуми, извршниот директор Оливер Блуме ја подготвува стратегијата „Vision 2030“, која предвидува нови мерки за намалување на трошоците со цел компанијата да се прилагоди на сè поконкурентните услови на глобалниот пазар.
До 100.000 работни места под знак прашалник
Според неофицијалните информации, новата програма би можела да резултира со укинување на до 100.000 работни места ширум светот.
Во Германија, пак, постои можност постепено да бидат затворени четири фабрики – во Хановер, Емден, Цвикау и Некарсулм, каде што работат околу 40.000 вработени.
Според германскиот магазин „Шпигел“, доколку планот биде усвоен, производството во овие погони постепено би се гасело до 2034 година.
Планот предвидува:
- од 2031 година да престане производството во фабриките во Цвикау и Емден;
- во 2032 година да биде затворена фабриката за лесни комерцијални возила во Хановер;
- а фабриката на Ауди во Некарсулм да го запре производството во 2034 година.
Компанијата засега не ги потврдува информациите
Од Фолксваген засега не ги потврдуваат овие информации. Од компанијата соопштија само дека менаџментот интензивно работи на идниот план за трансформација, без да открива дополнителни детали.
Доколку најавите се остварат, тоа би претставувало едно од најголемите кратења на работни места во историјата на компанијата и уште еден показател за предизвиците со кои се соочува европската автомобилска индустрија во услови на транзиција кон електрични возила, силна конкуренција од Кина и намалена побарувачка на одделни пазари.
Извор: b92.net
