Кинеските хуманоидни роботи доминираат на пазарот: Еве колку чини еден робот
Хуманоидните роботи произведени во Кина сè повеќе доминираат на светскиот пазар и го привлекуваат вниманието на јавноста со своите напредни способности, вклучувајќи изведување акробатски движења, регулирање сообраќај и подготовка на различни напитоци.
Сепак, дел од експертите предупредуваат дека побарувачката сè уште заостанува зад обемот на производството.
Минатата година на глобалниот пазар биле испорачани повеќе од 13.000 хуманоидни роботи, а водечките кинески брендови AGIBOT и Unitree испорачале по повеќе од 5.000 единици, со што покриле околу 85 проценти од пазарот, пренесува Associated Press.
Кинеските стартап-компании имаат значајна предност благодарение на силната државна поддршка, усогласена со петгодишниот план за периодот од 2026 до 2030 година, во кој напредните технологии и хуманоидната роботика се поставени како приоритетни области за развој.
Компанијата Unitree веќе работи исклучително профитабилно, со минатогодишни приходи од околу 250 милиони долари и нето-добивка која надминала 41 милион долари.
Покрај неа, значителен раст бележат и компаниите Matrix Robotics од Шангај и EngineAI од Шенжен.
Кинеските роботи се поевтини
Кинеските хуманоидни роботи во просек се најмалку 20 проценти поевтини од странските модели благодарение на користењето локално произведени компоненти. Некои поедноставни модели на кинескиот пазар чинат дури и помалку од 6.000 долари.
Американската банка Morgan Stanley проценува дека просечната цена на хуманоиден робот ќе се намали од 46.000 долари, колку што изнесувала минатата година, на околу 21.000 долари до 2050 година.
Предизвици за индустријата
И покрај големиот оптимизам меѓу инженерите, бројни експерти предупредуваат дека поголемиот дел од денешните хуманоидни роботи имаат повеќе забавна и демонстративна улога отколку вистинска практична примена.
Според нив, овие машини сè уште не се способни сигурно да функционираат во сложени и непредвидливи реални средини.
Аналитичарите посочуваат дека многу фабрики веќе користат класични роботски раце за извршување повторливи задачи и немаат реална потреба од скапи роботи со човечки изглед. Поради тоа, технолошките компании сè уште се соочуваат со предизвикот да најдат доволно купувачи во индустрискиот сектор.
Дополнителен предизвик претставува собирањето квалитетни податоци од реални средини, како што се канцеларии, продавници и работни простори, за роботите да можат да се обучат за извршување разновидни и сложени задачи наместо само една повторлива активност. Според експертите, за ваквата обука ќе бидат потребни уште многу години работа.
Амбициозни прогнози за иднината
Прогнозите за развојот на индустријата остануваат исклучително амбициозни. Morgan Stanley очекува продажбата на хуманоидни роботи во Кина оваа година да се зголеми повеќе од двојно и да достигне околу 28.000 единици.
Во меѓувреме, истражувачката компанија Omdia проценува дека на почетокот на следната деценија годишната глобална испорака на напредни роботи би можела да надмине еден милион примероци.
Извор: b92.net
