Купил делови за мотор преку интернет за 350 долари: Механичарот останал шокиран кога ги ставил на работната маса

Купувањето автомобилски делови преку интернет може да изгледа како одлична можност за заштеда, особено кога цените се значително пониски од оние во специјализираните продавници. Сепак, едно неодамнешно искуство покажува дека евтините производи можат да донесат и сериозни проблеми.

Ерик Вајнгартнер, чија компанија „Weingartner Racing“ е специјализирана за машинска обработка и подготовка на глави за мотори, тестирал комплет глави за мотор од типот Vortec, нарачан преку платформата Temu.

Комплетот чинел само 350 долари, вклучувајќи ја монтажата и испораката до адреса. Станува збор за исклучително ниска цена, особено ако се земе предвид тежината на деловите и трошоците за транспорт.

Но, кога деловите биле детално проверени, станало јасно зошто нивната цена била толку ниска.

Неправилно обликувани комори за согорување

На прв поглед, усисните и издувните канали изгледале сосема прифатливо. Меѓутоа, коморите за согорување биле неправилно конструирани.

Наместо правилна, заоблена форма, каква што имаат оригиналните GM Vortec глави или квалитетните заменски делови, коморите биле деформирани и наликувале на лошо нацртано срце.

Според проценката, ваквиот облик веројатно бил полесен и поевтин за производство, но не може да обезбеди соодветни перформанси на моторот.

Проблемите не завршувале тука. Иако каналите однадвор изгледале прифатливо, само издувната страна го поминала основниот тест за вакуумско заптивање.

Усисните вентили немале соодветни закосени премини што овозможуваат подобар проток на воздухот, додека седиштата на вентилите имале голем број остри рабови кои дополнително го попречувале протокот на гасови.

Дополнителен проблем биле малиот простор меѓу осигурувачите и гумичките на вентилите, како и слабите пружини. Овие недостатоци значително го ограничувале изборот на брегасти осовини што можат да се комбинираат со деловите.

Тестовите покажале многу лоши резултати

Сите утврдени недостатоци се одразиле и врз резултатите од тестирањето на протокот на воздух.

Резултатите биле толку лоши што, според Вајнгартнер, веројатно воопшто не се исплатува овие глави да се монтираат, дури ни како замена за фабричките глави на постари мотори.

Зошто е важен протокот кај Vortec моторите?

Протокот на гасови е една од најважните карактеристики на технологијата Vortec, која „General Motors“ ја воведе во своите мотори во средината на осумдесеттите години од минатиот век.

Називот доаѓа од способноста на главата на моторот да создава вител во комората за согорување, со цел смесата од воздух и гориво да се запали што поцелосно и поефикасно.

Поставувањето вакви глави на постари V8 мотори треба да биде релативно едноставен начин за зголемување на нивната моќност. Но, тоа е можно само доколку деловите се правилно конструирани и прецизно изработени.

Во конкретниот случај, тоа очигледно не било исполнето.

Искуството претставува уште едно предупредување за ризиците од купување исклучително евтини автомобилски делови преку интернет. Ниската цена може да биде примамлива, но квалитетот и безбедноста не треба да се занемарат при изборот на компоненти за моторот.

Извор: Blic.rs