Некои ќе мора да го вратат додатокот од 300 евра

Енергетскиот додаток од 300 евра требаше пред четири години да им го олесни товарот на милиони вработени во Германија поради високите цени на енергијата. Меѓутоа, сега за некои граѓани ситуацијата станува непријатна.

Даночната управа во одредени случаи има право да побара враќање на износот од 300 евра.

Иако изгледа како тоа да било одамна, таканаречениот енергетски паушал во Германија (EPP), во износ од 300 евра, беше исплатен во 2022 година со цел да се ублажи ударот од наглиот раст на цените на енергијата за вработените. Сепак, за дел од примателите тие пари сега може да претставуваат проблем. Актуелната пресуда на Финансискиот суд во Минстер појаснува кој ја сноси одговорноста.

На поголемиот дел од примателите EPP им беше исплатен автоматски во септември 2022 година преку работодавачот. Право на исплата имаа само лица кои беа неограничени даночни обврзници во Германија, односно кои имаа живеалиште или вообичаено престојувалиште во таа земја, пишува магазинот „Феникс“.

Во пракса, работодавачите не ја проверувале детално таа околност. Се воделе според законските критериуми и го исплаќале паушалот доколку постоел активен работен однос и доделен даночен број. Токму тоа подоцна довело до проблеми.

За време на дополнителните даночни контроли, даночните управи во некои случаи побарале враќање на 300 евра од работодавачите, на пример кога било утврдено дека работниците немале живеалиште во Германија и со тоа немале право на енергетскиот додаток.

Финансискиот суд во Минстер донесе важна одлука со која ги ослободува работодавачите од одговорност. Судот утврди дека работодавачите не се обврзани детално да проверуваат дали вработените ги исполнуваат сите услови за исплата и дека смеат да се потпрат на формалните критериуми пропишани со закон.

Добра вест за работодавачите

Пресудата е добра вест за работодавачите, но лоша за дел од вработените. Во случајот со Германија, тоа значи дека лицата кои го примиле енергетскиот додаток без законско право на него мора да сметаат на директно барање за враќање од страна на даночната управа.

Ова пред сè се однесува на лица кои во 2022 година работеле во Германија, но немале живеалиште ниту вообичаено престојувалиште во таа земја. Таквите лица треба да проверат дали во таа година имале статус на неограничена даночна обврска во Германија.

Доколку даночната управа испрати решение за враќање, тоа не смее да се игнорира. Во повеќето случаи можностите за жалба се многу ограничени и износот мора да се врати.

Најновата пресуда јасно порачува: одговорноста не ја сносат работодавачите, туку вработените, доколку условите за исплата на енергетскиот паушал не биле исполнети.

Извор: b92.net