Пакетите пристигнуваат од воздух: Amazon ја проширува доставата со дронови
Американската технолошка компанија Amazon објави дека до крајот на годинава ќе ја прошири доставата со дронови на речиси 500 градови и населени места во САД, што би претставувало шесткратно зголемување во однос на досегашниот опфат на услугата Prime Air.
Потпретседателот на одделот Prime Air на Amazon, Дејвид Карбон, претходно им соопштил на вработените дека компанијата оваа година планира да реализира еден милион испораки со дронови, пренесува CNBC.
Компанијата соопшти дека досега реализирала неколку стотици илјади испораки, со илјадници испораки дневно.
Дроновите носат пакети до 2,3 килограми
Дроновите на Amazon можат да пренесуваат пакети со тежина до 2,3 килограми, на растојание од околу 12 километри.
Повеќето пратки пристигнуваат за околу еден час, додека некои биле доставени само неколку минути по нарачувањето.
Компанијата тестира и систем со сајла за спуштање на пакетите, кој би требало да овозможи побезбедна испорака на кршливи производи и намирници.
Конкуренцијата веќе реализира милиони испораки
И покрај плановите за значително проширување, Amazon сè уште заостанува зад конкуренцијата.
Конкурентната компанија Wing, во сопственост на Alphabet, оваа година веќе ја надмина бројката од еден милион комерцијални испораки со дронови.
Уште еден конкурент, стартапот Zipline, веќе работи на четири континенти, а досега испорачал околу два милиони пратки.
Проширувањето на Prime Air покажува дека доставата со дронови постепено преминува од експериментална технологија во реален дел од системот за испорака, при што технолошките компании се натпреваруваат кој побрзо ќе го развие овој вид услуга.
Извор: b92.net
