Пристигна „Големото останување“: Зошто промената на работа повеќе не се исплати?
За време на бумот на вработување во периодот на пандемијата, познат како „Големата оставка“, промената на работното место речиси секогаш значеше значително зголемување на платата.
Финансиската добивка од промена на работата сè повеќе се намалува, а сè поголем број вработени ја избираат сигурноста наместо ризикот. Овој тренд економистите сега го нарекуваат „Големото останување“ (Great Stay).
Според анализа на Институтот на Bank of America, медијалното зголемување на платата за оние што смениле работа во јануари оваа година изнесувало околу 4%. Тоа е помалку од една третина од зголемувањата што работниците ги добиваа на врвот во 2022 година (околу 14%), па дури и помалку од зголемувањата кои беа стандард пред пандемијата, во 2019 година, пренесува CNBC.
Крај на агресивната борба за таленти
Причината за овој пресврт е едноставна – пазарот на трудот се „олади“. Во текот на 2021 и 2022 година, работодавачите агресивно се натпреваруваа за секој кандидат, туркајќи ги платите нагоре дури и за таканаречени латерални премини (премин на иста позиција во друга компанија).
Денес ситуацијата е поинаква. Базата на кандидати е огромна, бројот на слободни работни места се врати на нивото пред пандемијата, а компаниите повеќе немаат причина да нудат нереално високи плати за да привлечат нови луѓе.
Невработеноста благо расте, а економијата повеќе не ја „апсорбира“ работната сила како пред неколку години.
Исчезна „премијата“ за промена на работа
Податоците покажуваат дека разликата меѓу оние што ја напуштаат работата и оние што остануваат речиси исчезнала. Додека во 2022 и 2023 година оние што менуваа работа можеа да сметаат на плата што расте за околу два процентни поена побрзо од платата на колегите што остануваат во истата компанија, во 2025 и 2026 година таа разлика речиси се стопи.
Сега растот на платите за оние што менуваат работа изнесува околу 4,4%, додека оние што остануваат кај истиот работодавач бележат раст од 3,9%. Разликата стана толку мала што многу работници проценуваат дека ризикот од премин во нова средина, нов тим и нови предизвици едноставно не се исплати за толку мал финансиски плус.
„Гушкање на работното место“ како нова стратегија
Економистите забележуваат и феномен што го нарекуваат „job-hugging“ (гушкање на работното место). Вработените стануваат значително повнимателни и цврсто се држат до позициите што веќе ги имаат.
Стапката на доброволно напуштање на работното место падна од 3% на околу 2%.
Во свет каде што вработувањето забавува, а економската неизвесност расте, лојалноста кон сегашниот работодавач повторно станува рационална економска одлука, а не само прашање на навика.
Се чини дека ерата во која секоја промена на работа носеше „брза заработка“ заврши – сега фокусот е на стабилност и долгорочен развој во веќе познат систем.
Извор: BIZLife
