Пронајден нов џиновски диносаурус во Тајланд: Тежел 27 тони

Научници, врз основа на остатоци ископани во Тајланд, идентификуваа нов вид џиновски диносаурус со долг врат, двојно поголем од тираносаурус рекс. Наречен „Нагатитан“, тој е најголемиот диносаурус некогаш пронајден во Југоисточна Азија и припаѓал на групата долговрати тревојади познати како сауроподи, пренесува BBC.

Тежел колку девет азиски слонови

Според проценките, „Нагатитан“ тежел околу 27 тони, што е еднакво на масата на девет возрасни азиски слонови, а бил долг околу 27 метри – подолг и од познатиот диплодокус.

Живеел пред околу 100 до 120 милиони години, односно околу 40 милиони години пред појавата на тираносаурусот.

Откритие по десет години

Новиот вид бил идентификуван од тим истражувачи од Обединетото Кралство и Тајланд, врз основа на фосили пронајдени пред десет години покрај едно езерце во североисточен Тајланд.

Научниците наведуваат дека ова откритие фрла ново светло врз тоа како промените во древните климатски услови можеле да влијаат врз развојот на џиновските диносауруси.

Целосното име на диносаурусот е „Nagatitan chaiyaphumensis“.

„Нага“ се однесува на змијолико суштество од фолклорот на Југоисточна Азија, „титан“ на божествата од грчката митологија, додека „chaiyaphumensis“ значи „од Чаијафум“, покраината каде што биле откриени фосилите.

„Последниот титан“ на Тајланд

Тајландскиот докторанд Титивут Сетапаничсакул од University College London (UCL) и главен автор на студијата објавена во списанието Scientific Reports изјавил дека нагатитанот го нарекле „последниот титан“ на Тајланд.

Причината е што фосилите биле пронајдени во најмладата карпеста формација во земјата што содржи остатоци од диносауруси.

„Помладите карпи што се таложеле кон крајот на ерата на диносаурусите веројатно не содржат нивни остатоци, бидејќи регионот до тогаш станал плитко море. Затоа ова би можел да биде последниот или најновиот голем сауропод што ќе го пронајдеме во Југоисточна Азија“, објаснил тој.

Сетапаничсакул, кој за себе вели дека бил „дете опседнато со диносауруси“, изјавил дека со оваа студија си го исполнил детското ветување дека еден ден ќе именува диносаурус.

Богато наоѓалиште и влијание на климата

„Нагатитан“ е 14-тиот диносаурус што добил име во Тајланд.

Палеонтологот д-р Сита Маниткун од Универзитетот Махасарахам истакнала дека земјата има голема разновидност на фосили од диносауруси и дека „веројатно е трета најбогата во Азија по бројот на остатоци од диносауруси“.

„Нагатитан“ живеел во период кога нивото на јаглерод диоксид во атмосферата растело, а глобалните температури биле високи.

Коавторот на студијата, професорот Пол Апчрч од UCL, изјавил за National Geographic дека е „малку необично што сауроподите можеле да се справат со повисоки температури“, бидејќи големите тела потешко ја ослободуваат топлината.

За Reuters тој изјавил дека „веројатно високите температури влијаеле врз растителната храна која им била важна на сауроподите, со оглед на тоа што биле огромни тревојади“.

Извор: Index.hr