Вила ја издавал за 5.000 евра од ноќ, но за државата не постоела: Една пријава откри сè

Луксузна вила на Миконос била рекламирана на социјалните мрежи и на платформи за резервации, а цената за една ноќ достигнувала и до 5.000 евра. Имала фотографии, гости, резервации, па дури и сметки за уплата. Сепак, за грчките даночни власти практично не постоела.

Случајот кој сега привлече внимание започнал со една пријава од граѓанин, а завршил со даночна контрола и казна од десетици илјади евра.

Една пријава била доволна

Лицето кое го пријавило случајот до грчката Независна управа за јавни приходи (AADE) не испратило само сомнеж дека сопственик на вила можеби не пријавува приходи.

Доставило конкретни информации – адреса на објектот, интернет-страници преку кои се вршеле резервациите, како и податоци поврзани со банкарските сметки.

Даночната управа проценила дека постои висок даночен ризик и започнала контрола.

Инспекторите ги провериле и банкарските трансакции, а токму таму се појавил клучниот момент.

Луксузната вила, која на гостите им наплаќала и до 5.000 евра за една ноќ, никогаш не била регистрирана во грчкиот регистар за краткорочно изнајмување недвижности.

По контролата, сопственикот добил казна од десетици илјади евра, објави грчкиот портал ProtoThema.

Даночниците сè повеќе го следат дигиталниот траг

Случајот од Миконос покажува колку многу се променил начинот на кој даночните служби ги откриваат непријавените приходи од туристичко изнајмување.

Речиси секој објект што денес се изнајмува остава дигитална трага.

Тука се огласите и фотографиите, цената на ноќевањето, податоците од платформите за резервации, банкарските трансакции, информациите за недвижноста и, на крајот, даночната пријава.

Грчките власти можат да ги споредат податоците што ги пријавил сопственикот со информациите достапни на интернет и кај платформите за изнајмување.

А бројките покажуваат дека контролите не се само формалност.

Со споредување на пријавените приходи со податоците што Airbnb, Booking и Vrbo ги доставиле за 2020, 2021 и 2022 година, грчките власти идентификувале 24.383 даночни обврзници кај кои била утврдена разлика поголема од 500 евра.

Бројот на вакви случаи растел од година во година – од 6.222 во 2020 година, на дури 17.525 во 2022 година.

Нов трик – „двојна витрина“

Сепак, сопствениците и посредниците на недвижности пронаоѓаат и нови начини за обид да го заобиколат системот.

Еден од нив во грчките медиуми е наречен „двојна витрина“.

Принципот е едноставен.

Вилата или апартманот прво се огласуваат на голема платформа, каде што потенцијалниот гостин може да ги види фотографиите, локацијата, цената и оценките.

Откако ќе се појави заинтересиран клиент, комуникацијата се префрла надвор од платформата – на приватна веб-страница, социјални мрежи или директно кај сопственикот.

На гостите може да им биде понудена пониска цена со објаснување дека така се избегнува провизијата што ја наплаќа платформата.

Но, тоа што резервацијата ќе се префрли надвор од платформата не значи дека исчезнува и даночната обврска.

Токму затоа грчките даночници се обидуваат да ги поврзат различните траги – од огласот и резервацијата, преку банкарската уплата, до износот што сопственикот го пријавил во даночната пријава.

Случајот со вилата на Миконос можеби започнал со само една пријава од граѓанин, но покажува колку е тешко денес недвижност која јавно се рекламира и се изнајмува за илјадници евра по ноќ истовремено да остане целосно „невидлива“ за државата.

Извор: Telegraf Biznis