До 69.700 евра годишно: Ова се трите професии што ја привлекуваат генерацијата З
Младите генерации на пазарот на труд денес не бараат само високи плати, туку и флексибилност, сигурност и чувство дека нивната работа има смисла.
Затоа три професии се издвојуваат како најатрактивни меѓу припадниците на генерацијата З, во која спаѓаат луѓето родени помеѓу 1997 и 2012 година, пишува магазинот „Феникс“.
Иако генерацијата З често се прикажува стереотипно како помалку мотивирана и премногу фокусирана на социјалните мрежи, реалноста е поинаква. Многу млади луѓе се водат од различни вредности при изборот на кариера: покрај добрата заработка, тие ги ценат флексибилните услови за работа, стабилноста и можноста за балансирање помеѓу приватниот и професионалниот живот.
Сè повеќе млади бараат работни позиции што нудат долгорочни перспективи, можности за развој и рамнотежа помеѓу работата и приватниот живот, а не само брза популарност на интернет.
Смислата на работата поважна од кога било
Повеќе од половина од припадниците на генерацијата З веруваат дека смислата на работата е клучен фактор при вработувањето. Ова влијае и врз финансиските одлуки – оние што планираат долгорочно да останат во професијата внимателно ги избираат условите за работа и можностите за напредување. Покрај платата, сигурноста и флексибилноста се подеднакво важни.
За работодавачите тоа значи дека веќе не е доволно да се понуди висока плата – потребни се и опции за работа од дома, флексибилно работно време и работни позиции што имаат општествена вредност.
Софтверски девелопер – до 69.700 евра годишно
Една од најбараните професии е развојот на софтвер. Побарувачка за стручњаци има во речиси сите индустрии, а работата од далечина и флексибилното работно време веќе се стандард.
Интересно е што познавањето на вештачка интелигенција дополнително ги зголемува шансите за вработување, наместо да ја загрозува оваа професија. Просечната годишна бруто плата изнесува околу 69.700 евра, што ја прави оваа работа една од најатрактивните за младите.
UX дизајнер – околу 53.000 евра годишно
UX дизајнот (дизајн на корисничко искуство) е исто така многу популарен меѓу младите бидејќи комбинира технологија и креативност.
UX дизајнерите работат на креирање интерфејси, апликации и веб-страници со цел корисничкото искуство да биде што поедноставно и попријатно. Флексибилните услови за работа се вообичаени и во оваа област, а просечната годишна плата изнесува околу 53.000 евра.
Психолог – до речиси 60.000 евра годишно
Психологијата е третата област што привлекува голем број млади луѓе, најмногу поради желбата да им се помогне на другите и да се работи нешто што има подлабоко значење.
Дополнително, сè повеќе се развиваат можностите за онлајн консултации и дигитална работа. Просечната бруто плата на психолог е околу 52.900 евра годишно, додека психотерапевтите можат да заработат и до 59.600 евра.
Генерацијата З не избира само „лесни“ или популарни професии од социјалните мрежи, туку сè повеќе се насочува кон занимања што нудат знаење, стабилност и долгорочна перспектива – заедно со добар баланс помеѓу работата и приватниот живот.
Извор: b92.net
