Мизрахи: Ќе направам се што е во моја моќ за вработените во социјалните центри добијат подобри услови за работа
Министерката за труд и социјална политика, Рашела Мизрахи денеска беше на работна посета во Центрите за социјална работа во Тетово и Гостивар и оствари средба со директорите на социјалните центри, истакна Мизрахи на нејзината фејсбук страна:
Денеска бев во работна посета на Центрите за социјална работа во Тетово и во Гостивар остварувајќи средба со Дарко Обалиќ, директор на центарот во Тетово и со директорката Нада Величковска во ЦСР Гостивар.
Мојата заложба и интерес се условите во коишто работат центрите и начинот на работа со странките кои бараат услуги од нив. При тоа, потенцирав дека прва и основна цел на центрите е од тука да излезат задоволни странки посебно затоа што станува збор за лица кои се најчесто во некаков ризик или, пак лица коишто имаат потреба од подадена рака од државата од одреден момент во нивниот живот.
Од разговорите ги слушнав проблемите и предизвиците со кои се соочуваат вработените во овие центри. Тие се детектирани и ветувам дека сѐ што е во моја моќ и во рамки на законите ќе биде преземено за вработените да добијат подобри услови за работа бидејќи ако се тие задоволни и странките ќе бидат задоволни од нивните услуги.
Вработените во центрите се линкот помеѓу ранливите категории на граѓани и државата којашто треба да ги слушне нивните проблеми за потоа да дизајнира политики прилагодени на потребите на лицата во социјален ризик.
