Во која земја најмногу се работи од дома во Европа? Една е далеку пред другите

Работата од дома стана нормална појава по пандемијата, но не се применува еднакво во сите европски земји. Според најновите податоци, Обединетото Кралство (Велика Британија) е лидер во Европа кога станува збор за работа од далечина – вработените таму во просек работат од дома 1,8 дена неделно. Со оваа бројка, Британија е втора во светот меѓу 40 анализирани земји.

Кои се следните на листата?

Финска е веднаш зад Британија со просек од 1,7 дена работа од дома неделно, а потоа следува Германија со 1,6 дена. Португалија има 1,5 дена, додека Унгарија и Холандија бележат по 1,4 дена.

Вработените во Чешка, Италија и Шведска работат од дома во просек по 1,3 дена неделно – нешто над глобалниот просек кој изнесува 1,2 дена. Романија, Шпанија и Австрија се точно на тој просек, додека Франција, иако една од најголемите економии, заостанува со само 1 ден неделно.

Каде најмалку се работи од дома?

Грција е на дното во Европа со само 0,6 дена работа од дома неделно. Причините за ова се повеќеслојни – економската структура, големата зависност од туризмот, малопродажбата и угостителството, но и културолошки и институционални фактори.

Д-р Џеват Ѓирај Аксој, главен економист на Европската банка за обнова и развој (ЕБОР) и професор на Кралскиот колеџ во Лондон, вели: „Грција има ниско ниво на индивидуализам, а дигиталната трансформација и менаџерските практики беа недоволно развиени пред пандемијата, што го забави преминот кон работа од далечина.“

Зошто Британија е лидер?

Според Аксој, клучен фактор е индивидуалистичката култура: „Британците се поподготвени за автономна работа, што ја олеснува транзицијата кон работа од дома“. Додава дека строгите и долготрајни карантини за време на пандемијата исто така одиграле голема улога, а британската економија, која е фокусирана на услужниот сектор (финансии, медиуми, консалтинг), нуди повеќе можности за ваков начин на работа.

„Работниците во Велика Британија сега очекуваат да работат од дома 2 до 3 дена неделно. Тоа повеќе не се смета за бенефит, туку за стандард“, вели тој и предупредува дека компаниите кои не се прилагодуваат, ризикуваат да ги изгубат своите таленти, особено во конкуренција со други англискојазични земји.

Скандинавија без униформност

Иако Финска бележи високо ниво на работа од дома, другите скандинавски земји не се на истиот степен. Норвешка и Данска имаат по само 0,9 дена неделно, додека Шведска е на средината со 1,3 дена. Ова се должи на различните културни и управувачки пристапи – Финска, на пример, има долга традиција на поттикнување рамнотежа помеѓу приватниот и професионалниот живот, како и давање поголема автономија на работниците.

Општ тренд на опаѓање

Глобално, просечниот број денови работа од дома падна од 1,6 дена неделно во 2022 година на 1,33 дена во 2023. Во 2024 и 2025 година тој број дополнително се намали на 1,27 дена неделно.

„Оваа стабилност не значи дека нема промени“, заклучува Аксој. „Мали промени се сѐ уште можни, особено со напредокот на технологијата, промените во демографијата и условите на пазарот на труд.“

Извор: BIZLife / K. J.