Третина од лекарите и медицинските сестри во Европа страдаат од депресија
Здравствените работници ширум Европа се соочуваат со сериозна ментална криза. Според новото истражување на Светската здравствена организација (СЗО), секој трет лекар и медицинска сестра страдаат од депресија, додека секој десетти размислува за самоубиство.
Истражувањето, кое опфати повеќе од 90.000 лекари и медицински сестри од земјите на Европската унија, Исланд и Норвешка, покажува алармантни податоци.
Еден од тројца лекари и медицински сестри во Европа страда од депресија, додека 10 отсто од испитаниците пријавиле пасивни суицидални мисли во текот на претходната година.
„Ова е неприфатлив товар за оние кои се грижат за нас. Не мора да биде вака“, порача д-р Ханс Хенри Клуге, директор на СЗО за Европа.
Насилство, прекувремена работа и несигурни договори
Работните услови дополнително го влошуваат менталното здравје на здравствените работници:
- Изложеност на насилство: Еден од тројца здравствени работници навеле дека во изминатата година биле изложени на малтретирање или закани со насилство на работното место, додека 10% пријавиле физичко насилство или сексуално вознемирување.
- Прекувремена работа: Дури четвртина од лекарите работат повеќе од 50 часа неделно.
- Несигурност: Голем број вработени, 32% од лекарите и 25% од медицинските сестри, имаат привремени договори за работа, што дополнително го поттикнува чувството на несигурност.
Работниците кои се изложени на насилство, долги смени и исцрпувачки работен ритам значително почесто страдаат од депресија, анксиозност или имаат суицидални мисли.
Последици по пациентите и здравствениот систем
Менталните проблеми на здравствените работници директно влијаат и на квалитетот на здравствената заштита.
Помеѓу 11% и 34% од испитаниците размислуваат да ја напуштат работата, што е особено загрижувачко во светло на сѐ поголемиот недостиг од медицински кадар. Проценките говорат дека до 2030 година на Европа ќе ѝ недостигаат дури 940.000 здравствени работници.
Кога персоналот заминува од работа или користи боледување поради ментално здравје, здравствените системи дополнително се оптоваруваат. Пациентите тогаш чекаат подолго и добиваат полоша нега.
„Физички и ментално сме исцрпени, што за жал понекогаш доведува и до медицински грешки“, изјави Мелани Дебаре, специјализант по радиологија од Франција.
Таа наведе и загрижувачки податоци од Франција: дури 66% од студентите по медицина доживеале епизода на депресија, а 21% имале суицидални мисли во последната година, што е трипати повеќе отколку во општата популација.
СЗО: Неопходни се итни промени
СЗО ги повикува здравствените системи итно да преземат мерки за подобрување на благосостојбата на своите работници. Меѓу препораките се:
- строга политика на нулта толеранција кон насилството на работното место,
- преиспитување на сменското и прекувременото работење, за да се запре културата на работа до исцрпеност,
- и обезбедување достапна психолошка поддршка.
„Менталната криза меѓу здравствените работници е всушност криза на здравствената безбедност. Таа ја загрозува стабилноста на цели здравствени системи. Не смееме да ги изгубиме поради прегорување, очај или насилство“, предупреди Клуге.
