Шпанија го продолжува платеното родителско отсуство за двајцата родители: Пример за грижа за работниците и еднаквост

Шпанија го најави планот за дополнително проширување на платеното родителско отсуство, потврдувајќи го својот статус како една од социјално најодговорните земји во Европската унија.

Со најновата мерка, мајките и татковците ќе добијат уште една дополнителна недела платено отсуство по раѓањето на детето, со што вкупното траење на ова право ќе изнесува 17 недели – едно од најдолгите и најдарежливите во Европа.

Шпанија и Финска се единствените земји во ЕУ што ги третираат еднакво двајцата родители кога станува збор за целосно платено родителско отсуство.

„Шпанија се движи кон феминизам и еднаквост… и нема враќање назад. Гледаме напред. Четворица од десет мажи во нашата земја сега користат родителско отсуство. Тоа е феминистички успех“, изјави министерката за труд Јоланда Дијаз на прес-конференција.

Владата, исто така, одобри и дополнителни две недели платено отсуство што родителите ќе можат да ги искористат сè додека нивното дете не наполни осум години.

И покрај тоа, оваа мерка сè уште не се совпаѓа со ветувањето дадено за време на изборната кампања во 2023 година, кога владејачката Социјалистичка партија и нејзиниот левичарски коалициски партнер Sumar, предводен токму од Дијаз, најавија воведување на 20 недели родителско отсуство.

Предлогот сè уште треба да добие формално одобрување од парламентот. Радикалната левичарска партија Podemos, чии гласови се неопходни за усвојување на законот, се залага за уште подолго отсуство.

Малцинската влада на социјалистичкиот премиер Педро Санчез се соочува со предизвици во обезбедувањето доволна поддршка за законот, бидејќи истовремено води преговори со повеќе политички групи. Сепак, Дијаз изјави дека „парламентарните групи добро реагираа“ на предлогот.

Неколку земји, како Хрватска, Ирска и Бугарија, нудат подолго родителско отсуство од Шпанија, но се значително помалку дарежливи кога станува збор за правата на татковците.

Извор: EUpravo zato