„Ако немате 70 години, не можете да работите овде“: Хит идеја од Јапонија – чајџилница вработува само пензионери

Додека осаменоста и економската несигурност сè повеќе ги погодуваат постарите лица ширум светот, во Јапонија се појавуваат иновативни решенија кои им овозможуваат повторно активно да се вклучат во општеството.

Еден од најинтересните примери доаѓа од токискиот округ Шибуја, каде што работи необична чајџилница во која можат да се вработат исклучиво лица постари од 70 години.

„За да работите во оваа чајџилница, мора да имате најмалку 70 години. Работата се одвива според посебни правила“, изјавил креативниот директор на чајџилницата, Сугуру Мјоен.

Работа прилагодена на постарите

Чајџилницата го носи името G-Ча и Ba-Ча, што претставува игра на зборови инспирирана од јапонските називи за баби и дедовци, како и зборот „оча“, што значи чај.

За разлика од класичните угостителски објекти, тука работните услови се целосно приспособени на потребите на повозрасните вработени. Тие ги услужуваат гостите додека седат, можат да направат пауза секогаш кога ќе почувствуваат замор, а најважното правило е – работата да биде пријатна и забавна.

„Јапонија старее со огромна брзина. Сакавме токму од Шибуја, место познато по новите идеи и културни трендови, да испратиме порака како општеството може да одговори на овој предизвик“, вели Мјоен.

Огромен интерес за работа

Интересот за вработување бил далеку поголем од очекуваното. По објавувањето на огласот пристигнале повеќе од 100 пријави.

Според директорот, кандидатите најмногу ги привлекува можноста повторно да се поврзат со луѓето, да бидат активни и да чувствуваат дека придонесуваат за заедницата.

Едноставен систем за нарачки

За да им се олесни работата на повозрасните вработени, ресторанот вовел едноставен систем за нарачување.

Гостите ги пополнуваат своите нарачки на формулари достапни на јапонски и англиски јазик, а можат да означат и дали сакаат да разговараат со вработените или да се фотографираат со нив. Формуларите се пополнуваат со впечатливи розови маркери, кои се полесни за читање.

Јапонија бара решенија за стареењето на населението

Проблемот со стареењето на населението во Јапонија е сè поизразен. Секоја десетта личност во земјата има повеќе од 80 години, додека речиси една третина од населението е постаро од 65 години. Тоа значи дека повеќе од 35 милиони жители се во повозрасна возраст.

Затоа, јапонските институции и работодавци со години развиваат политики за продолжување на работниот век. Законот за стабилизација на вработувањето на постарите лица е донесен уште во 1971 година, а измените од 2013 година дополнително ја зголемиле стапката на вработеност кај лицата во шеесеттите години од животот.

Податоците покажуваат дека денес во Јапонија работат околу 5,4 милиони лица постари од 70 години. Од нив, само 1,81 милион се самовработени, што укажува на сè поголем тренд постарите лица да продолжуваат да работат како редовно вработени и по навршувањето на седмата деценија од животот.

Извор: Blic.rs