Бугарија воведе виза за дигитални номади: Апликациите се отворени

Бугарија официјално воведе виза за дигитални номади, а апликациите веќе се отворени. Земјата е сè подобро подготвена да ја пречека растечката заедница на луѓе кои работат онлајн и на кои доволни им се лаптоп и интернет конекција.

Трошоците за живот во Бугарија се значително пониски во споредба со повеќето европски земји, градовите се млади и динамични, со сè повеќе услуги прилагодени за работа на далечина, додека викенд-патувањата нудат разновидни опции – од импресивни планински масиви до живописни морски летувалишта.

Дополнително, Бугарија неодамна го воведе еврото и во 2025 година влезе во Шенген-зоната, што дополнително ја позиционира како практична база за патувања низ Европа.

Кој може да аплицира за виза за дигитални номади во Бугарија?

Право на аплицирање имаат државјани на земји кои не се членки на Европската унија или Европската економска зона (ЕЕЗ), а кои работат на далечина и приходите ги остваруваат надвор од Бугарија.

Во рамки на програмата постојат три категории на апликанти: лица вработени на далечина во компании регистрирани надвор од ЕУ, ЕЕЗ и Швајцарија; сопственици на компании или лица кои поседуваат повеќе од 25 отсто удел во претпријатие регистрирано во странство; како и фриленсери или самостојни професионалци кои најмалку една година пред поднесувањето на барањето обезбедувале услуги за клиенти надвор од Бугарија.

Апликантите мора да докажат и годишен приход од најмалку 50 пати од бугарската минимална месечна плата. Со оглед на тоа што минималната плата моментално изнесува 620 евра, минималниот годишен праг е околу 31.000 евра.

Како да се аплицира за бугарска виза за дигитални номади?

Постапката за аплицирање се одвива во две фази.

Во првата фаза, заинтересираните треба да обезбедат долгорочна виза од типот D во бугарска амбасада или конзулат во својата матична земја. Процесот може да трае од четири до осум недели. Оваа виза им овозможува на странските државјани влез во Бугарија и поднесување барање за дозвола за престој.

По пристигнувањето во земјата, во рок од 14 дена, потребно е да се поднесе барање за дозвола за престој во рамки на програмата за дигитални номади.

Меѓу задолжителните документи се доказ за сместување во Бугарија (договор за закуп, потврда за хотелска резервација или доказ за сопственост на недвижен имот), уверение за неосудуваност од земјата на престој, како и преводи на странските документи на бугарски јазик со апостил, каде што е потребно. Исто така, неопходно е да се достави доказ за исполнување на минималниот услов за приход.

Според наводите на платформата за совети за работа на далечина Citizen Remote, апликантите мора да приложат и доказ за здравствено осигурување кое важи во Бугарија за целиот период на престој и ја покрива територијата на целата Шенген-зона, односно Европската унија.

Во завршната фаза, дигиталните номади можат да поднесат барање за издавање идентификациска картичка. Целата постапка може да трае подолго од три месеци.

Дозволата за престој првично се издава на период од една година, со можност за продолжување за уште една година, доколку и понатаму се исполнуваат пропишаните услови.

Извор: EUpravo zato