Девет грчки плажи го загубија признанието „Сино знаме“

Признанието за квалитет „Сино знаме“ им е одземено на девет грчки плажи лоцирани на островите Хиос и Парос. Ова се случува поради недоволна подготвеност за актуелната сезона или бидејќи при спроведените проверки биле констатирани пропусти во исполнувањето на строгите барања на програмата. Сепак, важно е да се потенцира дека квалитетот на водата за капење и натаму е одличен, во согласност со меѓународните стандарди, извести дописничката на МИА од Атина.

Грчкото друштво за заштита на природата, кое е истовремено и администратор на меѓународната програма „Сино знаме“, информира дека четири локалитети на Парос и пет на Хиос се отстранети од националната и меѓународната листа за 2026 година, губејќи го претходно стекнатото признание.

„Според процедурата на програмата, експертите од Грчкото друштво за заштита на природата, заедно со меѓународни оценители, кои реализираа ненајавени инспекции, идентификуваа недостатоци во однос на исполнетоста на критериумите кои се однесуваат на: услугите за посетителите (вклучително и за лицата со посебни потреби), безбедноста на присутните, чистотата и соодветното информирање“, стои во соопштението од организацијата.

Дополнително, тие истакнаа дека последниот рок за исполнување на стандардите бил 1 јули. По овој датум, членовите на надлежните комисии на програмата донеле одлука, согласно утврдените правила, да ги повлечат наградите со цел да се зачува угледот и довербата во институцијата.

Организаторите, исто така, нагласија дека продолжуваат со редовни контроли на сите локалитети во земјата кои го носат обележјето „Сино знаме“. Најголем дел од овие инспекции се изведуваат без претходно најавување. Доколку бидат откриени неправилности и на други плажи, ќе следат дополнителни одземања на признанието.

„Нагласуваме дека причината за повлекувањето на овие конкретни плажи е недоволната организација, но квалитетот на водите за капење останува на високо ниво, согласно стандардите на програмата“, порачаа од организацијата која управува со меѓународната програма „Сино знаме“.

Грчкото друштво за заштита на природата, кое е задолжено за спроведувањето на меѓународната програма „Сино знаме“, на средината на мај годинава информираше дека наградата ја добиле 624 грчки плажи, 17 марини и 17 туристички јахти. Со ова, Грција го задржа своето второ место меѓу 52 земји на глобално ниво по бројот на „сини знамиња“, кои се индикатор за квалитетот на водата за пливање, заштитата на животната средина, организацијата и безбедноста на посетителите.