Европското здружение на производители на автомобили бара исклучок за Велика Британија од новите правила на ЕУ

Европското здружение на производители на автомобили (ACEA) побара од Европската Унија да ја изземе Велика Британија од новите правила за државни субвенции во автомобилската индустрија.

Од здружението предупредуваат дека, доколку тоа не се случи, британските производители би можеле практично да го загубат пристапот до најголемиот извозен пазар, што би претставувало една од најсериозните последици од Брегзит за автомобилскиот сектор, пренесува „Гардијан“.

Според предлогот на Индустрискиот акцелераторски акт, право на субвенции за производство и купување автомобили би имале само производителите чии возила и клучни компоненти се произведуваат во Европската Унија.

Претставниците на автомобилската индустрија сметаат дека од овие правила треба да бидат изземени Велика Британија, Турција и Мароко, бидејќи нивните производствени капацитети се силно интегрирани во европските синџири на снабдување.

Во меѓувреме, Европската комисија води разговори со британската влада и Здружението на производители и трговци со моторни возила (SMMT) со цел британските компании да го задржат пристапот до европскиот пазар и по воведувањето на новите правила.

Производители како BMW, Volkswagen и Nissan предупредуваат дека, доколку не биде одобрено изземањето, дел од нивните фабрики во Велика Британија би можеле да бидат затворени или значително да го намалат производството.

Европската Унија ги предложи новите правила како дел од мерките за зајакнување на домашното производство на автомобили и заштита на европските производители од конкуренцијата на субвенционираните кинески електрични возила. Сепак, претставниците на индустријата предупредуваат дека ваквиот пристап може сериозно да ги наруши веќе воспоставените производствени синџири меѓу ЕУ и Велика Британија.

Извор: EUpravo zato / Euronews