ГЕРМАНИЈА ВОВЕДУВА НОВИ ПРАВИЛА ПРОТИВ ЛАЖНИТЕ БОЛЕДУВАЊА, боледувањето ја чинеше германската економија повеќе од 200 милијарди евра

Германската влада планира да ја укине можноста за отворање боледување преку телефон и да воведе обврска за поднесување лекарско уверение на првиот ден од болеста, во обид да ги намали сè почестите отсуства на вработените од работа и растечките трошоци на економијата.

Тој нагласи дека Германија повеќе не може да го игнорира фактот дека вработените сè повеќе отсуствуваат од работа, додека компаниите истовремено бележат пад на продуктивноста и зголемување на трошоците, со што се отвора една од најчувствителните економски и социјални теми во таа земја.

Затоа германската влада најави укинување на боледувањето преку телефон и воведување обврска за вработените да поднесат лекарско уверение на првиот ден од болеста, со цел да се зголеми конкурентноста на најголемата економија во Европа во рамките на новите економски и работни реформи.

Според извештајот на германската влада, објавен од Билд, секој вработен во Германија во текот на 2024 година отсуствувал од работа во просек 20,8 дена. Тоа е речиси четири дена повеќе отколку во 2020 година.

881,5 милиони денови за боледување за само една година

На ниво на целата земја, ова значи дури 881,5 милиони денови боледување за само една година.

Според податоците на германската влада, загубите во производството предизвикани од отсуство на вработените достигнаа 134 милијарди евра минатата година, додека трошоците за надоместоци за плати за време на боледување се искачија на 72,3 милијарди евра.

Вкупно, боледувањето ја чинеше германската економија повеќе од 200 милијарди евра. Особено загрижувачки е фактот што трошоците продолжуваат да растат. Уште во 2020 година, загубите во производството беа проценети на 87 милијарди евра, што значи дека се зголемиле за речиси 50 милијарди за само неколку години.

Во исто време, трошоците за исплата на плати на вработените на боледување се зголемија за повеќе од 15 милијарди евра, односно за 26,4 проценти.

Според податоците од владиниот извештај, секој изгубен работен ден ги чинел работодавците во просек 152 евра минатата година, што е за 28 евра повеќе отколку пред пет години.

За земја чија економија веќе се соочува со послаб индустриски раст, недостиг на работна сила и растечка меѓународна конкуренција, ваквите трошоци станаа сериозно прашање на економската политика.

Во центарот на целата дискусија е таканаречената „telefonische Krankschreibung“, односно можноста вработениот да добие потврда за привремена неспособност за работа без да оди на лекар, пренесуваат медиумите.