Кина го забрзува развојот на роботиката: Годинава се очекува производство на повеќе од 100.000 хуманоидни роботи

Кина очекува во текот на оваа година да произведе повеќе од 100.000 хуманоидни роботи, изјави заменик-директорот на Одделот за наука и технологија при кинеското Министерство за индустрија и информатички технологии, Ган Сјаобин.

Обраќајќи им се на новинарите по повод претстојната Светска конференција за вештачка интелигенција (WAIC) во Шангај, тој истакна дека развојот на вештачката интелигенција и ширењето на AI-екосистемот го забрзуваат растот на кинеската индустрија за роботика и претставуваат еден од клучните двигатели на идниот технолошки развој на земјата.

Според него, повеќе од 30 проценти од големите кинески индустриски компании веќе користат апликации базирани на вештачка интелигенција, пренесува новинската агенција Синхуа.

Шангај ќе биде домаќин на еден од најголемите AI-настани во светот

Од 17 до 20 јули 2026 година, во Шангај ќе се одржи Светската конференција за вештачка интелигенција (WAIC), заедно со состанок на високо ниво посветен на глобалното управување со вештачката интелигенција.

Организаторите најавуваат дека овогодишното издание ќе биде едно од најголемите светски случувања посветени на развојот и примената на AI.

На конференцијата се очекува учество на повеќе од 1.100 компании изложувачи, ќе бидат претставени над 3.000 производи и технолошки решенија, а изложбениот простор ќе зафаќа повеќе од 100.000 квадратни метри.

Програмата ќе опфати повеќе од 140 тематски форуми, со учество на над 1.400 меѓународни гости, наведуваат организаторите.

Извор: b92.net