Младинската невработеност во ЕУ се намали на 15,1 отсто во јули

Стапката на невработеност кај младите под 25 години во Европската Унија во јули 2026 година изнесувала 15,1 отсто, што претставува намалување во однос на 15,6 отсто регистрирани еден месец претходно, покажуваат најновите податоци на Евростат.

Во јули во ЕУ биле невработени околу 2,93 милиони млади лица, од кои 2,37 милиони живееле во земјите од еврозоната. Таму стапката на младинска невработеност изнесувала 14,9 отсто, наспроти 15 отсто во јуни.

За само еден месец бројот на невработени млади во ЕУ се намалил за 98.000 лица, додека во еврозоната падот изнесувал 26.000.

Сепак, споредбата со истиот период минатата година покажува поинаква слика. Во однос на јули 2025 година, бројот на невработени млади во ЕУ е зголемен за 29.000, а во еврозоната за 40.000 лица.

Вкупната стапка на невработеност во ЕУ во јули останала непроменета на 6,1 отсто, додека во еврозоната изнесувала 6,4 отсто.

Според проценките на Евростат, во јули без работа биле вкупно 13,516 милиони луѓе во ЕУ, од кои 11,264 милиони во еврозоната. Во споредба со јули минатата година, бројот на невработени во Унијата се зголемил за 296.000 лица.

Податоците покажуваат и разлика според полот. Стапката на невработеност кај жените во ЕУ изнесувала 6,3 отсто, а кај мажите 5,9 отсто.