Nestlé гаси 16.000 работни места

Швајцарскиот прехранбен гигант Nestlé на почетокот на неделата соопшти  дека ќе згасне околу 16.000 работни места во следните две години за да ги намали трошоците.

Компанијата ќе отпушти околу 12.000 административни работници во сите оддели и региони во кои работи и уште 4.000 по спроведувањето мерки за зголемување на продуктивноста во производството и синџирите на снабдување.

Nestlé мора да се „промени побрзо“ за да се прилагоди на променливите глобални услови, рече извршниот директор Филип Навратил, додавајќи дека отпуштањата се „тешка, но неопходна одлука“.

Како дел од новиот план, менаџментот на Nestlé има за цел да ги намали трошоците за три милијарди швајцарски франци (3,23 милијарди евра) до 2027 година. Досега планираше да ги намали трошоците за 2,5 милијарди франци. Најголемата компанија за храна во светот ги објави намалувањата на работните места во својот прелиминарен извештај за работењето за првите девет месеци од оваа година.

Се очекува раст за целата година

Во периодот од јануари до септември, приходите на Nestlé изнесуваа 65,9 милијарди франци (70,8 милијарди евра), што е намалување од 1,9 проценти во однос на истиот период минатата година. Кога се исклучуваат флуктуациите на валутите и еднократните ставки, приходите се зголемија за 3,3 проценти.

Неповолните девизни курсеви го намалија резултатот за 5,4 проценти. Продажбата во првите девет месеци се зголеми за 0,6 проценти, а цените се зголемија за 2,8 проценти, покажа деловниот извештај. Резултатите на европскиот пазар покажуваат 3,7 проценти повисоки цени отколку во првите девет месеци од минатата година и зголемување на продажбата за 0,5 проценти.

За целата 2025 година, менаџментот на Nestlé очекува „малку посилен органски раст“ од минатата година, без да прецизира бројки. Резултатите од минатата година покажаа органска стапка на раст од 2,2 проценти, најниска за најмалку 25 години.