Зошто Генерацијата Z и работодавците не ги делат истите вредности?

Постои длабок јаз помеѓу она што Генерацијата Z (Gen Z) го вреднува и она што работодавците всушност го бараат.

Тимот на компанијата „Becoming You Labs“ спроведе истражување користејќи ја алатката „The Values Bridge“, која мери 16 клучни животни вредности врз основа на 100 прашања поврзани со однесувањето. Од мај, повеќе од 77.000 луѓе учествувале во тестирањето, а резултатите биле споредени со анкета спроведена меѓу 2.100 менаџери за вработување од различни индустрии, од технолошкиот сектор и консалтинг до банкарство и професионални услуги.

Резултатите покажаа целосна неусогласеност: Генерацијата Z најмногу ја цени личната грижа, автентичноста и помагањето на другите, додека работодавците бараат луѓе чии приоритети се постигнувањата, учењето и работната етика.

Само 2% од младите ги делат истите вредности како нивните претпоставени, пишува CNBC.

Овој судир на генерации одразува длабока промена во сфаќањето на работата и смислата на кариерата, со дополнителен притисок од вештачката интелигенција, која се заканува да ги укине и оние ретки почетни позиции до кои може да дојде Генерацијата Z.

Рамнотежа помеѓу вредностите и кариерата

1. Бидете искрени со себе за вредноста на парите

Многумина ја потценуваат важноста на материјалната сигурност додека не ја изгубат. Неопходно е да знаете колку ви е „доволно“ за да имате мир, без разлика дали тоа е еден добар одмор годишно или луксузен животен стандард. Кога ќе сфатите каде богатството се наоѓа на вашата листа на приоритети, полесно ќе одлучите дали сте подготвени да работите во средина која бара повеќе труд од вас, или во онаа која става фокус на рамнотежата и благосостојбата.

2. Изберете (или изградете) средина што ги споделува вашите вредности

Ако не сакате да се откажете од своите уверувања, барајте компании кои ја промовираат благосостојбата на вработените, автентичноста и општествената одговорност. Таквите места стануваат сè попопуларни, па и конкуренцијата ќе биде поголема, затоа истакнете се со добро CV и мотивациско писмо. За најхрабрите, тука е и претприемништвото, можност сами да ја обликувате работната средина според сопствените вредности.

3. Направете „десетгодишен договор“ со самите себе

Ако моментално ви е приоритет вработувањето, а животниот баланс е долгорочна цел, можно е привремено да „одложите“ некои вредности и да се фокусирате на градење кариера.

Со други зборови, прифатете ја идејата за одложена сатисфакција. Посветете се на работата доволно долго за да ги видите резултатите, наместо секој ден да ја преиспитувате одлуката.

На крајот, начинот на кој ги живеете вашите вредности можеби е најважната одлука што некогаш ќе ја донесете. Таа ја обликува вашата цел, приход и чувство на смисла. Пристапете ѝ зрело, со свест за тоа кои сте денес и какви сакате да бидете утре.

Извор: BIZLife