Пензионерите нема да бидат воодушевени: Франција разгледува мерки за штедење

Француската влада разгледува неколку мерки за намалување на јавниот дефицит, меѓу кои и укинување на усогласувањето на највисоките пензии со инфлацијата и преиспитување на даночниот одбиток од 10 проценти.

Мерките би биле дел од буџетот за 2027 година, а францускиот министер за економија Ролан Лескир смета дека и најимотните пензионери треба да дадат свој придонес во стабилизирањето на јавните финансии.

Гостувајќи на радиото RTL, Лескир нагласи дека не станува збор за класично намалување на пензиите, туку за можност пензиите на најбогатите граѓани да растат побавно од инфлацијата.

„Разбирам дека постои фрустрација. Ги слушам резервите на различни луѓе околу тоа дали пензионерите треба да дадат свој придонес. Дали постојат причини сите да вложат напор, освен пензионерите кои во некои случаи се во релативно поволна финансиска состојба? Одговорот очигледно е не“, изјави министерот.

На удар и дел од бонусите

Владата разгледува и дополнителна мерка која би можела да ги зголеми трошоците за работодавачите и вработените.

Станува збор за воведување социјални придонеси на бонусите за успешност, бонусите поврзани со учеството во добивката, како и на уплатите од работодавачите во штедни планови над одреден износ.

Според француската влада, мерките се неопходни за да се подобри состојбата со јавните финансии.

„Ако ништо не преземеме, ќе удриме во ѕид“

Лескир ги отфрли критиките дека предложените мерки се непопуларни, нагласувајќи дека секоја од нив има своја причина.

„Ако ништо не преземеме, ќе удриме во ѕид. Ќе имаме буџетски дефицит од околу шест проценти. Целта е во најлош случај тој да биде пет проценти, а би сакале да биде дури и под тоа“, предупреди францускиот министер.

Предлозите сè уште се разгледуваат, а конечната форма на мерките ќе биде позната со усвојувањето на буџетот за 2027 година.

Извор: B92.net