Синдикатот на новинари и медиумски работници на Србија му се обрати на Братина

Синдикатот на новинари и медиумски работници на Србија (SINOS) денеска го повика министерот за информирање и телекомуникации, Борис Братина, да организира дијалог меѓу претставниците на синдикатите и работодавачите со цел потпишување грански колективен договор во медиумската дејност.

Од SINOS посочија дека пред околу една година подготвиле работна верзија на Гранскиот колективен договор, усогласена со највисоките стандарди на Европската и Меѓународната федерација на новинари, по што документот бил доставен до ресорното министерство.

Тие додаваат дека поранешниот министер за информирање, Дејан Ристиќ, организирал редовни состаноци со новинарските и медиумските синдикати за сите планирани активности да бидат реализирани до крајот на 2025 година, но дека по падот на претходната влада дијалогот бил прекинат.

Според Акциониот план на Медиумската стратегија, потсетуваат од SINOS, било предвидено социјално-економскиот дијалог во медиумската дејност да се воспостави до крајот на 2023 година, но рокот бил поместен за крајот на 2025 година поради несоработка од страна на медиумските работодавачи.

Во Медиумската стратегија е констатирана неповолната социо-економска и професионална положба, како и безбедноста на новинарите и медиумските работници. Особено тешка е состојбата на новинарите ангажирани преку договори за привремени и повремени работи, авторски договори и договори за дело, наведуваат од синдикатот.

Истовремено, се потсетува дека истражувањата покажуваат оти половина од медиумските работници работат на несигурни работни места, додека стабилен работен однос најчесто имаат постарите новинари и медиумски работници, на возраст меѓу 50 и 60 години.

Помалку од една третина од младите новинари имаат работен однос на неопределено време, а во најнеповолна положба се новинарите и медиумските работници во онлајн медиумите, каде што има најмалку вработени на неопределено, истакнуваат од SINOS.

Платите на новинарите и медиумските професионалци се ниски и под републичкиот просек, исплатите често се нередовни, а голем број вработени работат прекувремено. Во комбинација со недоволната сигурност на работното место, ова ги става во категоријата на прекарни работници и, според синдикатот, претставува дискриминација во смисла на член 16 од Законот за спречување на дискриминација.

Извор: Danas.rs